Read berom Lɛlɛ 138 Bible Online

Lɛlɛ 138 - berom bible

Lɛlɛ 138

¹À Dagwi Darwey, mê feng a hwo na yey hom mwa; mê ra lwɛlɛ̂ somo mo e nuyêl bemat-lagwi.

²Mê ye guduruk me bɛrɛng Gbɔng Duk Re Fongol mō wo jɛrɛ, mê feng a hwo yaga tɛ̂ yey na tsak o mō, yaga hwà ga tɛ̀ reza na reha mo e ra mwa pyɛ́.

³Tuk de ma yila hwà hanat a me, nɔng me gap na yey ting.

⁴À Dagwi Darwey, begbɔng begwɔ̀m jey mwa ba rɔda feng a hwo, yaga ba ga wok neha nu mo.

⁵Ba rɔda ra lwɛlɛ e ra begwông Dagwi Darwey, yaga nedyɛt nerât mɛ na sé nerey o.

⁶Mwa ano de Dagwi Darwey a sé e rak o, e bɛrɛng vemo de ba jut ɛn ba sé pyɛ wɛt, vê dâk kaa, e kún ɛn.

⁷Mwa ano de reyɔm ra gwɔrɔ me, hwó dul me yi e shôm vê repugu hom, hwô nára vwɔ mo, vwɔ yege mo hwo sey me.

⁸Dagwi Darwey ê sila pyɛ de a ga yong yaga me, tɛ̂ yey mo hé nàra gbak-gbak. Hwo kwon ye bam a tomông vɔ mo wɛt.