Read berom Lɛlɛ 139 Bible Online

Lɛlɛ 139 - berom bible

Lɛlɛ 139

¹Lwɛlɛ̂ Davit. Gwá sè e vwɔ̂ mwât kyé na lɛlɛ À Dagwi Darwey, hwà ga ngyɛgɛt me, hwà ga tɔk me.

²Hwà tɔk kayɛ pyɛ de me ra, hwà kún bare hom.

³Hwo bɛ̀ɛ kwɛngɛl na pɔngɔ hom; hwà ga tɔ́k o na mwa begwong hom.

⁴Gyam na me hanat, hwà tɔk pyɛ de me kyè wɔ ha.

⁵Hwà gwɔrɔ me e kawɛ bak, hwà tɛ̀ vɔ e ra me.

⁶Tɔ́k de hwà tɔk me ha dal bare hom, ha sé e lɛrɛ, ma tɔk tɔk hɛ wɛt;

⁷E gwa de mê hywit me yi na hwo ɛ? E gwa de mê tele yi e nuyel mo ɛ?

⁸Ka ma hywit me vɔk e lagwi, hwà sé e hwomo, ka ma gyirik vɔk e kwɔ̂n bevuvwel, hwà sé e hwomo arɔng.

⁹Ka ma sogo, ma kwey rwa rak, me sangal e kwɔn de gwi gwo gabsa ɛ;

¹⁰E hwomo arɔng hwô kyè na me, Vwɔ yege mo gwô ye kap a me.

¹¹Mê tɔk yang lwil gwo lɛrɛ me, negbey de na gwɔrɔ me né tɛ́ ɛ turuk;

¹²Lwil gwa ka sé lwil na hwo wɛt, turuk ha sé wɛshɛrɛk sede nagwi. Lwil na negbey ba sé tyɛng na hwo.

¹³E hwo wɛ de hwà yong pyík hom; hwà manas me e jîm neng hom.

¹⁴Mê feng a hwo e begwông langat de hwà yong me, tomong mo ba sé pyɛ langat; ma tɔk vɛ naka sizɔng.

¹⁵Hwà bɛ̀ɛ me jeng de ba sè yong me e lɛrɛ, de ba sè manas me e ji jîm neng hom.

¹⁶Hwà di nedem hom de ba ga kana yong nɛ wɛt, ba jɛk mwa nepɔlɔ hom e bwok-basa mo, gyam hak e ji nɛ he pɛrɛ.

¹⁷À Dagwi, nebare mo na sé nerat sizɔng, nepyak nɛ na sé pyak.

¹⁸Ka sede mê bara nɛ, na dal bazɛk na nepyak. Jeng de me sene, hwà sé tanga me.

¹⁹À Dagwi, hwà yang wey na vê neves zɔng, vê mɔbɔs bemat bê gas ɛn yi na me.

²⁰Be ha há ves e ra hwo; vê repugu mo be sisa na reza mo e ra bɔs.

²¹À Dagwi Darwey, me bɛ̀ɛ na neves vemo de be bɛ̀ɛ hwo ves, me bɛ̀ɛ vê kyɛ́ ɛn hwo byɛm-byɛm.

²²Mê kyɛ́ me hɛn tsak kyɛ́ me, ma jut ɛn bemât repugu hom.

²³À Dagwi, mara me, na hwo tɔk yey hom, mara me na hwo tɔk bare hom.

²⁴Di, kɛ neves nehak na sé na me, kyè na me e begwông neken gbak-gbak.