Read berom Lɛlɛ 140 Bible Online

Lɛlɛ 140 - berom bible

Lɛlɛ 140

¹Lwɛlɛ̂ Davit. Gwá sè e vwɔ̂ mwât kyé na lɛlɛ À Dagwi Darwey, sey me yi e vê neves; dul me yi e vê sogô nehywɛ;

²vemo de be yong begwong beves e neyey mɛn, be cuga cōmo kahɛ tuk.

³Be lɔ̌ nenu mɛn sede begwɔ̄m, e nenu mɛn nedɔm na sé sede ne gàbak.

⁴À Dagwi Darwey, dul me yi e vwɔ̂ vê neves, dul me yi e vê sogô nehywɛ de be yong begwông gaba hom.

⁵Vê te how ba ga rene segun, ba ga tɛ̀ besoro e gwong mwa.

⁶Ma yang Dagwi Darwey, “Hwà sé Dagwi hom, wet betong na dâk gabɔk hom, yaga toshô reyɔm.”

⁷À Dagwi Darwey, Darwey hom, gbɔng mwât sey me, hwà dul to hom tûk como.

⁸À Dagwi, hwo nɔ̂ng vê neves pyɛ de be simo wɛt; hwo tik be di wɛng e ra begwong beves de be yongos wɛt; ka ano wɛt bê dak kaa.

⁹Hwo tik bemât repugu hom be di wɛng wɛt, tɛ̀ shisa mɛn vey sɛ̀ me he to ɛ e ra yɛn.

¹⁰Tɛ̀ cilâ kya ye gabsa e ra yɛn; tik be barak hɛn e ji kya, e bavɔng ciwil de bê to tɔk nusu wɛt.

¹¹Tik vemo de be ha ha ves be sɛ̀ kwɔn e vwel o wɛt; tik neves ne hwo e ra vê sogô nehywɛ!

¹²Ma tɔk Dagwi Darwey ê dul vemo de be tak a yɛn, ê gas shɔt e tē yaga bepɛng.

¹³Mwin vemo de ba sé cik e bayis mo bê feng a hwo; vemo de ba sé tɛk bê sangal e nuyel mo.