Read berom Lɛlɛ 143 Bible Online

Lɛlɛ 143 - berom bible

Lɛlɛ 143

¹Lwɛlɛ̂ Davit À Dagwi Darwey, wok won hom, wet betong na dâk gabɔk hom, yi na silâ sira mo; hanat a me yi na tsak o mo.

²Hwo tɛ̀ me mwât fwom mo e shɔt wɛt, vit a hwak de a sé cik e nuyel mo.

³Wo repugu a ga ro me, a ga kyira me kalas, a tɛ̀ me sangal e ji lwil sede vemo de ba ga kushu yimo.

⁴Ano ma ga pat ɛ yey, yey hom ya ga ye ywey.

⁵Me bare na nepɔlɔ̂ bama, me bare na mwa tomong mo, me bare ciwil na tomông vɔ mo.

⁶Me nára vɔ hom na hwo, neken hom ne wok yêy wosho mo sede vwel hwogot.

⁷À Dagwi Darwey, hanat a me dey! Ma ga ye waa! Lɛrɛ hwo yi na me wɛt! Ka ano wɛt, mê tɛ́ me sede vemo de be kyè vɔk e jêy bevuvwel.

⁸Me tɛ̀ gap e ra hwo, tik me di tɛ̂ yey mo, me sɛt bayis e ra hwo, dura a me gwong de mê raa.

⁹À Dagwi Darwey, sey me yi e vê repugu hom! Ma tele wɔ na hwo yaga kwôn dal!

¹⁰Basa a me, me ra pyɛ de hwó simo, hwà sé Dagwi hom, dura a me nerat, gyeng me e gwông netyang.

¹¹À Dagwi Darwey, dul me yaga reza mo, yi na tsak o mo, pat me yi e reyɔm.

¹²E ji tɛ̂ yey mo wey na vê repugu hom, wey na mwa vê repugu hom, ma sé mwat fwom mo.