Read berom Lɛlɛ 144 Bible Online

Lɛlɛ 144 - berom bible

Lɛlɛ 144

¹Lwɛlɛ̂ Davit Wò nerat à Dagwi Darwey, fwara hom! E masa a me tô como, e myak me yaga ano.

²Wo tɛ̂ yey hom, fwara hom, gap hom, mwât sey me, ruga hom de me tɛ̀ gap na yɛ, de e tɛ̀ bemat e vwɔ hom.

³À Dagwi Darwey, mwasi a sé sɛ de hwó jut ɛ e nû pyɛ ɛ? Mwasi de hwó bare na yɛ ɛ?

⁴Mwasi a sé sede nesong, nepɔlɔ mɛ na sé sede rezina.

⁵À Dagwi Darwey, wunta lagwi, ra beraku na be mugus sekyeng.

⁶Tomo na gbara, shara hɛn, ta ket mo, wey na yɛn.

⁷Nára vwɔ mo yi e lagwi, pat me, sey me yi e gwonshi tsik, yi e vwɔ̂ yére dyuk;

⁸Vemo de be yɛt nebɔs, be sira bê ha tsak o, ko bé ha bɔs.

⁹À Dagwi, mê ra a hwo lwɛlɛ pwas, mê ra a hwo lwɛlɛ na yom kwo.

¹⁰A sé yɛ wɛ e nɔ̂ng begbɔng begwɔ̀m neken, de e sey mwât fwom mɛ Davit yi e wal.

¹¹Hywit me, sey me yi e vwɔ̂ yére dyuk, vemo de be ha nebɔs, be sira bê ha tsak o ko bé ha bɔs.

¹²Tik nèy bewen mot ne re nuyel ne se rɔngɔl mwas sede batîn cɔ́gɔt de ba gyeng vɛ naka, tik behwóng mot be se sede beta kwɔng duk de ba yong na be dura nerât lɔ gwɔ̀m.

¹³Tik begban mot be sila na kayɛ yerê pyɛ̂ re, tik tyīmit mot ye gwɛ hɛ gu pyak, na ye to tɔs gu gu zang kuru e cɛ̀l mot.

¹⁴Tik berɔndɔng mot be sila na tɔ̂s nèy, vit a pâ nèy kɛ vit a tɔ̂s nɛ wɛt, tik tosho yaga reyɔm he sè e nehyok mot wɛt.

¹⁵Wò yey pyɛng à wane de nerat nemo na hwo e ra yɛ, wo yey pyɛng a wane de Dagwi mɛ a Dagwi Darwey.