Read berom Lɛlɛ 145 Bible Online

Lɛlɛ 145 - berom bible

Lɛlɛ 145

¹Lwɛlɛ̂ somô Davit Mê ha hâ gbɔng nerey mo a Dagwi, gbɔng gwɔ̀m hom, mê somo reza mo gbak-gbak.

²Kahɛ tuk mê somo hwo; mê somo reza mo nesheneshey.

³Dagwi Darwey a sé wo nerey, tik be somo hɛ yɔkyɔk, nerey mɛ na dal gâp mara.

⁴Bê somo tomong mo yi e zamang hemo wɔ e hek, bê ha gbɔng tomong mo.

⁵Mê ha e ra gbɔng nedyɛt nerat mo, na e ra tomong mo ve langat.

⁶Bê ha e ra tomong mo ve bengyip, mê ha gbɔng nerey mo.

⁷Yɛn ê ha pyak e ra nerat mo, bê ra lwɛlɛ e ra tsak o mo.

⁸Dagwi Darwey a sé wo nerat, wo toshô reyɔm. E ra shom ziri wɛt, ko e dura a bemat nerat mɛ ding-ding.

⁹E dura nerat na mwa bemat, nemwishish mɛ na sé e ra mwa yông vɔ mɛ.

¹⁰À Dagwi Darwey, mwa pyɛ́ de hwà yong yê somo hwo, mwa vemo de ba ga nɔng bato mɛn na hwo bê somo hwo.

¹¹Yɛn ê ha e ra gbɔng nerey segwɔm mō, bê ha e ra reto mo;

¹²na be dura mɛ gbɔng tomong mo e ji bemat, na gbɔng nerêy nedyɛt nerât segwɔm mo.

¹³Segwɔm mo sa sé gbak-gbak, kwɔ̂n rê negwɔm mo ha sé wɔ e mwa nezamang.

¹⁴Dagwi Darwey e gyep mwa vemo de be tē bugurɛk, e sogo na vemo de ba ga gaba.

¹⁵Mwa pyɛ́ de hwà yong ye bɛrɛng a hwo, hwô nɔng yɛ pyɛ̂ re e jeng o;

¹⁶Hwo nɔ̂ng yɛ washak, hwo re na kayɛ pyɛ cen sɛ̌ ya sirik.

¹⁷Dagwi Darwey e ra tsak o e mwa begwong mɛ, e ra tsak o e mwa pyɛ de e ra.

¹⁸A sé bagat na mwa vemo de be yila e ra yɛ, na mwa vemo de be yila hɛ na tsak o.

¹⁹E nɔ̂ng vemo de be sap ɛ pyɛ́, e wok tosho mɛn, e sey ɛn.

²⁰E dul mwa vemo de ba tɛ̀ yey na yɛ, e wey na mwa vê neves.

²¹Mê somo Dagwi Darwey, tik mwa yông vɔ mɛ be somo reza mɛ gbak-gbak.