Read berom Lɛlɛ 147 Bible Online

Lɛlɛ 147 - berom bible

Lɛlɛ 147

¹Somo hin Dagwi Darwey! A sé naka be ra a Dagwi mot lɛlɛ̂ na yom, a sé pyɛ yey pyɛng, be ra lɛlɛ ko a jam na be somo hɛ.

²Dagwi Darwey a to sé lɔk Yɛrusalɛm, e tula BeIsrayɛl vemo de ba hashe wɔ e sesam.

³E nɔng yey ting na vemo de ba ga waa, e rɔgɔs baram mɛn.

⁴E yɛrɛ nepyak netangacɛn, a nɔ̂ng kakɛ mo reza.

⁵Darwey mot a vɔk gbɔng nerey, a sila na reto; tɔ́k mɛ ha dal gâp bara.

⁶Dagwi Darwey e nɔng yey ting na vemo de be dyɛng bato mɛn, e tɛ̀ vê neves buruk e vwel.

⁷Ra in a Dagwi Darwey lwɛlɛ na nenɔrɔ̂ yey pyɛng, ra in a Dagwi mot lɛlɛ̂ somo na yom kwo,

⁸womo de a kyiri lagwi na bale, de e nɔngɔs jey rwak, e tɛ̀sɛ sɔng gwo ras e beraku;

⁹womo de e nɔngɔs ngyāma pyɛ̂ re, na nèy behwǎk jeng de ne tosho.

¹⁰E tɛ̀ gap e ra dwa, kɛ sugâ como wɛt.

¹¹Dagwi Darwey e pɛngɛ yey na vemo de be sap ɛ, na vemo de be sɛt yey e ra tɛ̂ yey mɛ.

¹²À Yɛrusalɛm, somo Dagwi Darwey! À Siyɔn, somo Dagwi mō;

¹³A tɛ̀ ri duk mo be vɔk gap, a tɛ̀ nerat e ra bemat mō.

¹⁴E nɔng netyang e yɛnɛ̂ sevwel mō, e nɔng o alkama de wa dal na nerat.

¹⁵E nɔng redu mɛ na jey, pyɛ de e ye be pere ra yɛ.

¹⁶E lasha nemuk-fwala sede gwoput, e shara fwala sede fongol kya.

¹⁷E tomsal na fwala sede cɛ̂k tuk, vit a mwat de e kyɛm a niri na neyɔɔtɔt o!

¹⁸E nɔng nu, fwala mo he ye ywey, e tɛ̀ gul gwo pɛl, ko nshi ne tele.

¹⁹E nɔng ha na Yakɔp, basa na badu mɛ na Israyɛl,

²⁰A ga ra ano na yére bemât jey o cak wɛt, yaga ano ya tɔk badu mo wɛt. Somo Dagwi Darwey!