Read berom Lɛlɛ 148 Bible Online

Lɛlɛ 148 - berom bible

Lɛlɛ 148

¹Somo hin Dagwi Darwey! Somo hin hɛ e lagwi, yin de yin a sangal e hwomo e tɛt o.

²Somo hin hɛ à yin betom mɛ mwa, somo hin hɛ à yin regyeng bemât como mɛ mwa.

³Somo hin hɛ à gwi na pwɛl, somo hin hɛ à yin netangacɛn de yin e nɛp mwa

⁴Somo hin hɛ à yin belagwi de yin a dal e ra rak o mwa, na yin à nshi de na sé e ra tɛ̂t lagwi mwa.

⁵Tik be somo rezâ Dagwi Darwey, yaga a nɔng nu ko ya tɛ́ ɛ,

⁶a yong yɛ na ye nára gbak-gbak, a tɛ̀ redu de rê sang sege hɛ wɛt.

⁷Somo hin Dagwi Darwey à yin de yin a sé e jey, yin bègwalwɛ̂l nshi na mwa pyɛ́ de ya sé e neciwîl begbɔng berep,

⁸kya na fwala, nemuk-fwala na mwɛngɛ, gûl rwak de gwo ra fwom na nɔ̂ng nu mɛ.

⁹À mwa yin beraku na berahwol, cɔgɔ̂t marâ nèy na mwa cɔgɔ̂t sida,

¹⁰mwa ngyāma na yas, pyɛ̂ gabaga na benon,

¹¹mwa à begbɔng begwɔ̀m na bemat, nèy gwɔ̀m na mwa bemat nuyel e jey,

¹²bebôt bewen na behwong rining o, bemakuk na nèy mwa,

¹³tik yɛn e somo rezâ Dagwi Darwey, reza mɛ zɔng de ra sé rerey, nedyɛt nerat mɛ na dal gâp jey na lagwi.

¹⁴A tɛ̀ bemat mɛ be vɔk gap, ano mwa bemat mɛ be somo hɛ, a kat mɛ BeIsrayɛl de ba sé bagat na yɛ. Somo Dagwi Darwey!