Read berom Lɛlɛ 149 Bible Online

Lɛlɛ 149 - berom bible

Lɛlɛ 149

¹Somo hin Dagwi Darwey! Ra in a yɛ lwɛlɛ pwas; somo hin hɛ e tulâ bemat mɛ de ba ga nɔng bato mɛn.

²Tik Israyɛl a vɔk yey pyɛng sizɔng na mwât yong mɛ, tik bemât Siyɔn be vɔk yey pyɛng na nzem yaga gbɔng gwɔ̀m mɛn.

³Tik be somo reza mɛ e rɛɛ, tik be ra a yɛ lɛlɛ̂ somo na bing na yom kwo;

⁴Dagwi Darwey e pɛngɛ yey na bemat mɛ, e nɔ̂ng vê dyɛ̂ng to nerey na neken.

⁵Tik vemo de ba ga nɔng bato mɛn be ra nzem yaga dî wɛng mɛn, tik be ra biibi e dyɛngɛ.

⁶Tik be gbɔ jeng de ba sé somo Dagwi, na bewal de ba sé vootot e kawɛ bak e vɔ mɛn;

⁷na be tala mɛ yére bemât jey, na tabâk bemat o,

⁸be rɔgɔs begbɔng begwɔ̀m mɛn na ngyang, bemat nuyel mɛn na ngyâng dyam,

⁹be yɛrɛ a yɛn shɔt de ba jɛk, hemo hɛ a nerey na mwa vemo de ba ga nɔng bato mɛn. Somo Dagwi Darwey!