Read berom Lɛlɛ 17 Bible Online

Lɛlɛ 17 - berom bible

Lɛlɛ 17

¹Wôn Davit. À Dagwi Darwey, wok won hom yaga yɛrɛ shɔt e tē, wet betong na sesin hom! Tɛ̀ betong, na hwo wok won hom, ma sé ra hɛ na yey rining.

²E hwo zɔng de hwô tɔk ye, vit a me na nɛn, yaga e hwo zɔng de hwà tɔk pyɛ de ya sé tsak o.

³Hwà tɔk yey hom. Ka turuk gbak hwà ga ngyɛgɛt me, ko hwà sɛ̀ me vit a nɛn. Ma ga tùt nu e ra pyɛ́ de bemat behak be ra wɛt. Ma ga ye ngyɛ́k, na me gyeng badu mō. Ma raa begwông bemat de ba kat yol wɛt,[7]

⁵ko ma raa begwong mō kayɛ jeng, ma ye bugurɛk wɛt.

⁶Me ra won na hwo à Dagwi, yaga hwô hanat a me. Wet betong na ha hom, wok me!

⁷Hwó tɛ̀ yey na me. Dura hɛ e gwong de gwô tɛ̀ bemat be langat hɛn. Vwɔ̂ gap mō gwo dul vemo de be jama kwɔ̂n dal na hwo yi na vê repugu mɛn.

⁸Gyeng me, sede hwó gyeng bayis mō. Dul me, sede congot ye gunung nèy yɛ,

⁹yaga bemat beves be hwosom me, vê repugu ba ga gwɔrɔ me, na be mɔrɔ me.

¹⁰Vit a hɛn na nemwishish, bé rwak nenu zɔng.

¹¹Ba ga kaba bol hom! Kagwa de ma doyo ɛ, a vemo, be wɛrɛm, na be gang me.

¹²Ba sé sede gukum de wa vɔk cwey ngyāma, sede gwɔ̀m ngyāma de wa sé e waba.

¹³À Dagwi Darwey, sogo! Hwo e ra bemât repugu hom, na hwo di wɛng e ra yɛn! Sey me na wal mō yi e vê neves.

¹⁴Sey me na vwɔ̂ gap mō yi na vemo de pyɔlɔ mɛn ya sé e jey yemo zɔng. Tabak hɛn na reyɔm de hwà ga tik yaga yɛn. Tik reyɔm o re vey a yɛn,[8] na nèy mɛn ne bin sɛ̀, na nèy nèy mɛn ne sɛ̀ bwang o arɔng!

¹⁵Ko me à me, vit a me na nɛn, yaga ano, mê di bayis mō à Dagwi Darwey. Jeng de me sene, yey hom ye pɛngɛ, yaga hwà sé tanga me.