Read berom Lɛlɛ 18 Bible Online

Lɛlɛ 18 - berom bible

Lɛlɛ 18

¹Lwɛlɛ̂ Davit, sam Dagwi Darwey. A ra gwɛ na a feng a Dagwi Darwey de a sey ɛ yi e vwɔ̂ vê repugu mɛ mwa, a kat mɛ yi e vwɔ̂ Saul. Gwá sè e vwɔ̂ mwât kyé na lɛlɛ À Dagwi Darwey, ma tɛ̀ yey na hwo! Hwó nɔng me gap.

²Hwà sé a me sede fwarâ dal, sede kwɔ̂n dál. Hwà sé Dagwi hom, mwât sey me, hwó tɛ̀ me sangal tyang, hwà sé a me sede ruga, sede ngɛngɛ de me dul mɛ to hom sede ngyi, hwà sé mwât vɔk neken hom gak.

³Jeng de me yila hwo yaga sɛlɛ, hwó sey me yi e vwɔ̂ vê repugu hom. Me somo hwo à Dagwi Darwey!

⁴Ngyâng reku ya ga vo me gak, gawey ha re me sede rwîk nshi.

⁵Negwi bevuvwel na vɛsɛ a me, reku ra simo re kyè na me.

⁶E ji reyɔm hom, ma yila Dagwi Darwey, ma tosho a Dagwi hom yaga sɛlɛ. A wok me e duk re a yɛ fongol, fwɔ̂ sesin hom gwa gaba e betong mɛ.

⁷Ko vwel ha hwo digis ding-ding, batîs beraku ba hwo rɛ̌, ba digis yaga shôm Dagwi ya sogo.

⁸Kyeng ha tugus yi e bavɔng wol mɛ, nebelem kya na tē bwerep yi e nu mɛ, cilâ kya ya tē cat.

⁹A wunta lagwi, a gyirik e jey na bale de ba siri e nɛ̂n bol mɛ.

¹⁰A laga pyɛ cen lagwi, ko a sogo e gwi, a sé turus, e tele, gul gwa gangas hɛ.

¹¹A bang rato mɛ na lwil, rwak de wa siri wa rɔnɔ hɛ.

¹²Yi na nedyɛt de na sé e nuyel mɛ, fwala tanga cíla kya ba tabas yi e ji bale mō.

¹³A lumta yi e lagwi, Ba wok fwɔ mɛ, yɛ Dagwi De A Dal Na Reto Mwa, gwa nusu yi e fwala na cíla kya mo.

¹⁴A tabas ket mɛ, ko a shara vê repugu mɛ, a ró ɛn na nedɛbɛt gbara, ba tele kpɛɛ.

¹⁵Jeng de Dagwi Darwey a shìra bemât repugu mɛ, jeng de shom mɛ ya ye puu, retîs gworep ra nusu wɛshɛrɛk, retîs vwel ra ta e jey.

¹⁶Yi e hwomo e lagwi, a nára vwɔ mɛ, a kaba me, a pat me e ji tɛmɛ-nshi.

¹⁷A sey me e vwɔ̂ bemât repugu hom vê gap, yi e vwɔ̂ vemo de ba kyɛ́ ɛn me, de ba dal me na gap.

¹⁸Jeng de ma sé sɔ reyɔm, ba hwo e ra me, ko Dagwi Darwey wɛ de a dul me.

¹⁹A pat me, a hala me washak, a sey me, yaga yey mɛ ya pɛngɛ na me.

²⁰Dagwi Darwey e tala me pyɔlɔ, yaga me ra pyɛ́ de ya sé a yɛ cik, e tala me na nerat, yaga a sɛ̀ me vit a nɛn.

²¹Me gyeng badu mɛ, Me doyo a yɛ bama, na me ra pyɛ́ vyes wɛt.

²²Me gyeng mwa pyɛ́ de a nɔng nu e ra yɛ, me kyɛ́ me nà gyeng badu mɛ wɛt.

²³Me ra tyɛng pyɛ́ de yɛ e simo, me gyeng tó hom yi e râ pyɛ́ vyes.

²⁴Ko Dagwi Darwey a tala me na nerat, yaga me ra pyɛ́ de ya sé a yɛ cik, a tala me pyɔlɔ, yaga a sɛ̀ me vit a nɛn.

²⁵À Dagwi Darwey, hwà sé pang na vemo de ba sé pang na hwo. Hwà sé wo nerat na vemo de ba sila gyat.

²⁶Hwà sé wo tsak o na vemo de ba sé vê tsak o, ko hwà sé kang-gang na vemo de ba sé kang-gang arɔng.

²⁷Hwó sey vemo de ba jut ɛn e nû pyɛ cak wɛt, ko hwó ra jɔgɔ na vemo de be dak kaa wɛt.

²⁸À Dagwi Darwey, hwó tɛ̀sɛ a me ɛ negbey, hwo wɛ de hwó ró a me lwil.

²⁹À Dagwi hom, hwó nɔngɔs me gap, na me hwo e ra vê repugu hom, na me tɔk re bapomo mɛn na como.

³⁰Ko Dagwi o, tomong mɛ ba sé gyat, reha mɛ ra sé tsak o, vit a tô yey. Yɛ a sé sede ruga na mwa vemo de be jama a dul ɛn.

³¹Dagwi Darwey nju mɛ zɔng, yɛ wɛ à Dagwi, e yɛ wɛ zɔng de a sé a wot fwarâ dal.

³²E nɔngɔs me gap, e yongos gwong de mê kyè ɛ tyang.

³³A nɔng me bol, na me tɔk tele sede vow, e tɛ̀ bol hom, be se kas-kas e ra beraku.

³⁴E masa a me begwông tô como, na me tɔk ye net a gbang dyam pama.

³⁵À Dagwi Darwey, hwó dul me, hwó sey me, hwó vɔk me na vwɔ yege mō. Sɛ́lɛ mō vɔk na me ha tɛ̀, ma tɛ́ me gbɔng mwat.

³⁶Hwó yong begwong hom tɛɛrɛ, mê tíi bol wɛt.

³⁷Ma ro bemât repugu hom, ma vos ɛn, ma toyo rè bama wɛt, sɛ̌ ma wey na yɛn hywiri.

³⁸Ma tow ɛn, ma pere tɛ̀ ɛn buruk e vwel, ba to tɔk sogo wɛt, ba dyɛng daalal e nɛ̂n bol hom.

³⁹Hwá nɔng me gâp tô como, hwá tik, me di wɛng e ra vemo de be hwo me.

⁴⁰Hwá tɛ̀, bemât repugu hom be tele yi e nuyel hom, ma wey na vemo de ba kyɛ́ ɛn me.

⁴¹Ba tosho yaga sɛlɛ, ko vit a mwat de a sey ɛn. Ba yila hwo, à Dagwi Darwey, ko hwà hanat a yɛn wɛt.

⁴²Ma bunut hɛn, ba tɛ́ ɛn sede fongol de gul gwo pɛsɛl, ma yishing hɛn sede rwik e hyok.

⁴³Hwà ga sey me yi e vwɔ̂ bemat de be hwosom me. Hwà ga tɛ̀, me re negwɔm e ra yére bemât jey, bemat de ma ka tɔk ɛn mwa wɛt ba tɛ́ ɛn besam hom.

⁴⁴Yɛn e vow, be tē a me guduruk, be dyɛng bato mɛn, ko be raa neha hom.

⁴⁵Ba ga tɛ́ ɛn gbɛrɛk, be nunus yi e nekwɔn dal mɛn na vôw rebek.

⁴⁶À Dagwi Darwey, hwà sé kwen! Mê somo hwo, hwà sé a me sede fwarâ dal! Mê nɔng o nerey, hwo mwât sey me.

⁴⁷Hwo wɛ de hwà tala vê repugu hom pyɛ́ de ba ra a me, hwà tɛ̀ yére bemât jey e nɛn hom.

⁴⁸À Dagwi Darwey, hwó sey me yi e vwɔ̂ vê repugu hom. Hwó nɔng me reto e ra bemat de be kyɛ́ ɛn me, hwó sey me yi e vwɔ̂ bemât sogô nehywɛ.

⁴⁹Yaga ano, à Dagwi Darwey, mê somo hwo, mê ra a hwo pee e ji yére bemât jey.

⁵⁰Hwà tɛ̀, gbɔng gwɔ̀m de hwà kasa a di gbɔng wɛng pyak, hwà tɛ̀ yey na Davit tanga yére mɛ gbak-gbak.