Read berom Lɛlɛ 19 Bible Online

Lɛlɛ 19 - berom bible

Lɛlɛ 19

¹Lwɛlɛ̂ Davit. Gwá sè e vwɔ̂ mwât kyé na lɛlɛ. Lagwi wó dura gbɔng nerêy Dagwi kyɛrɛng, gwi, pwɛl na netangacɛn ba sé fwôm vwɔ mɛ.

²Hemo a gasi e ra hemo he ha e ra gbɔng nerey o, hemo a turuk e ra hemo he shara nɛ arɔng.

³Vit a tîn ha de be ha, vit a fwɔ de be wok;

⁴Mwa ano, yɛgɛt mɛn ye shara hɛ vɔk e mwa jey, be wok yɛ e neyɛnɛ̂ jey mwa. E hwomo e ji lagwi Dagwi a yong kwɔn yaga gwi.

⁵Gwo nusu sede rwâs gwel e bɔrɔs vey pom, gwo nusu sede mwât râ jɔgɔ de a vɔk cwey tele.

⁶Gwo pɛrɛ yi e bak lagwi wok, ko gwo gwɔsɔ wɔ̀ ta e yɛnɛ̂ wok. Vit a pyɛ de ye tik nà wok nevɛ̌t gwɛ.

⁷Basâ Dagwi Darwey ha sila gyat, he turu bemat e ji sangal mɛn. Hâ Dagwi Darwey ha sé pyɛ tɛ̂ gap, he nɔngɔs netsitsɛng na vemo de ba bidɛ tɔk.

⁸Badu Dagwi Darwey ba sila gyat, vemo de be gyenges vɛ be vɔk yey pyɛng. Badu Dagwi Darwey ba sé wɛshɛrɛk, be wuma a bemat bayis.

⁹Sâp Dagwi Darwey ha sé pyɛ ryat sizɔng, ha vɔk nerat kayɛ jeng. Badu de Dagwi Darwey e nɔng ba sé tsak o, ba sé cik mwa vɛ.

¹⁰Ba dal celes dyam shinang, ba dal shok na neta.

¹¹À Dagwi Darwey, e badu mō de be hwɔtɔ a me betong, yi na gyengês vɛ, me sɛsɛm gbɔng pyɔlɔ.

¹²Wà de a tɔk neburu mɛ ɛ? Tɛ̀ me haalal yi e neburu gawey.

¹³Gyeng me yi e banɛ̂n garen, tik be vɔk reto e ra me wɛt. Ano mê se vit a nɛn, bê sɛ̀ me na nɛ̂n kyɛ́ me hwo wɛt.

¹⁴Tik na ha hom na bare hom he pɛngɛ a hwo yey. À Dagwi Darwey, hwà sé a me kwɔ̂n dal, hwó viri me!