Read berom Lɛlɛ 20 Bible Online

Lɛlɛ 20 - berom bible

Lɛlɛ 20

¹Lwɛlɛ̂ Davit. Gwá sè e vwɔ̂ mwât kyé na lɛlɛ À gbɔng gwɔ̀m mot, tik Dagwi Darwey a hanat a hwo, sede hwà tosho na yɛ e jeng de yɔ́m ha sɛ̀ o! Tik Dagwi wo Yakɔp a dul o!

²Tik a tomo a hwo sɛlɛ yi e kwɔ̂n sangal mɛ, a nɔng o sɛlɛ yi e Raku Siyɔn!

³Tik a bare na mwa nenɔrɔ mō, na a pɛngɛ yey na mwa pyɛ de hwó nása a yɛ!

⁴Tik a nɔng o pyɛ de yey mō ye simo, a tɛ̀ hwo di wɛng e kayɛ pyɛ de hwó yong!

⁵Ano kwong, wot ê ra pee yaga wɛng de hwà di, ko wot ê nára tuta, na wot a nɔ̂ng Dagwi mot mɛ nerey. Tik Dagwi Darwey a wok won mō mwa!

⁶À Dagwi Darwey, a remo, ma tɔk, hwô nɔ̂ng gbɔng gwɔ̀m, womo de hwà ga kasa wɛng. Hwô hanat a yɛ yi e lɔ mō e lagwi, ko hwô sey ɛ na vwɔ̂ gap mō.

⁷Bemat behak be tɛ̀ gap e ra bekyɛkyɛ̂ como mɛn, behak e ra bedwâ como mɛn, ko wot, wot ê tɛ̀ gap e ra Dagwi Darwey, Dagwi mot!

⁸Bemat vane mo bê tɛ́ ɛn gbɛrɛk, ko bê gaba, ko wot, wot ê gwɛ̌ gap, wot tumal gak.

⁹À Dagwi Darwey, tɛ̀ gbɔng gwɔ̀m mot a di wɛng! Hanat a wot, jeng de wot a jama sɛlɛ na hwo.