Read berom Lɛlɛ 21 Bible Online

Lɛlɛ 21 - berom bible

Lɛlɛ 21

¹Lwɛlɛ̂ Davit. Gwá sè e vwɔ̂ mwât kyé na lɛlɛ. À Dagwi Darwey, yêy gbɔng gwɔ̀m ya pɛngɛ, yaga hwà nɔng ɛ gap, a rɛ̌ na nzem yɔkyɔk, yaga hwà nɔng ɛ wɛng.

²Hwà ga nɔng ɛ pyɛ de yey mɛ ye simo, hwà ro mɛ na yɛ na pyɛ de a won wɛt.

³Hwà vey a yɛ na nerat pyak, hwà tɛ̀ a yɛ kpin wo celes dyam shinang.

⁴A mok pɔlɔ, hwà nɔng ɛ, hwà nɔng ɛ neken nelis.

⁵A vɔk gbɔng nerey yi na wɛng de hwà nɔng ɛ, hwà tɛ̀ ɛ gbɔng darwey, hwà tɔrɔ hɛ.

⁶Hwà tɛ̀ a yɛ nerat de nê nàra neshey gbak-gbak; yey mɛ ya pɛngɛ, yaga hwà sé tanga yɛ.

⁷À Dagwi Darwey, gbɔng gwɔ̀m a tɛ̀ gap e ra hwo. Hwo de Hwà Dal Na Reto Mwa, hwà tɛ̀ yey na yɛ, yaga ano, vit a pyɛ de yê dikta hɛ.

⁸À Dagwi Darwey, hwô vos mwa bemât repugu mō, hwô kaba kawɛ mwat de e bɛɛ hwo ves na vwɔ̂ gap mō.

⁹E tuk de hwô dura to mō, hwà rɔda wey na yɛn na kya, Shom mō yê re sede nebelem kya, hê rangas hɛn hwɛ́lɛng.

¹⁰Hwô tɛ̀ nèy mɛn ne vuru hɛn yi e jey, hwô pat yére mɛn yi e bemasi.

¹¹Mwa ano de yɛn a yong begwông nengyas e ra hwo, ba rɔda tɔk di wɛng wɛt.

¹²Hwô ye naw a gbang mō, na hwo ta ɛn mɛ, hwô tɛ̀ ɛn, be doyo na bama, be tele.

¹³À Dagwi Darwey, dura a yɛn gap mō! Ko wot ê ra a hwo pee, yaga tomong mō ve reto.