Read berom Lɛlɛ 22 Bible Online

Lɛlɛ 22 - berom bible

Lɛlɛ 22

¹Lwɛlɛ̂ Davit de be ra gwɛ na fwɔ̂ lwɛlɛ̂ “Lyop hywìi gasi.” Gwá sè e vwɔ̂ mwât kyé na lɛlɛ. À Dagwi hom, à Dagwi hom, yaga sɛ́ de hwà ga ye waa a me ɛ? Ma ga pɛsɛl sin yaga sɛlɛ, ko vey a remo, ma ga ka di pyɛ cak wɛt!

²À Dagwi hom, nagwi na naturuk me yila hwo, ko hwo hanat a me wɛt, me tɔk pɔnglɔ arɔng wɛt.

³Ko hwo, hwà sé Dagwi wo jɛrɛ, hwà sé sangal e gwofwa negwɔm mō, hwà sé womo de BeIsrayɛl be somo.

⁴Bedabeda mot ba sɛt bayis mɛn e ra hwo, ba tɛ̀ gap e ra hwo, ko hwà sey ɛn.

⁵Yɛn a tosho a hwo, ko hwà pat ɛn yi e reyɔm. Ba tɛ̀ gap e ra hwo, ko hwà tɛ̀ a yɛn rekyen wɛt.

⁶Ko me, ma sé pyongol zɔng, ma ka sé mwasi wɛt, bemat be jut me e nû pyɛ cak wɛt, kawɛ mwat e byɛs me.

⁷Mwa mwat de a di me e shɛgɛsh me, e túsa nu, e digis rato mɛ,

⁸ko e tē, “Tɛ̀ gap mō e ra Dagwi Darwey! Tik a pat o, a sey o! Hwà sé wo yey mɛ wɛt arɛt?”

⁹À Dagwi Darwey, e hwo de hwà tɛ̀, neng hom a tɔ me tyang, hwà gyeng me tyang, jeng de ma sè rɔngɔl ngas.

¹⁰Ba tik me e vwɔ mō yi e tûk tɔ hom, ko hwà sé Dagwi hom yi e jeng o.

¹¹Hwo sè yikyik na me wɛt, yaga yɔ́m ha sé, ko vit a mwât sɛlɛ!

¹²Bemât repugu pyak be gwɔrɔ me sede bemus, be rɔnɔ me sede bemùs vê gap yi e Bashan.

¹³Be wuma nenu mɛn hwɔng e ra me, sede begukum de be lulum, be tē lootot e ra mwat.

¹⁴Gap hom ha ga tala hɛ, sede nshi na ye jɔng e vwel. Mwa bahwɔ̂t nedem hom ba luyu hɛn, ma ga pat ɛ yey sede bèhamal shok de be ye ywey.

¹⁵Hwɔk hom[9] ha ga hworok, relem hom ra ga ye pang e nu, hwà ga tik me e fongol sede revin.

¹⁶Bemât nengyas ba gwɔrɔ me sede kwarâ bevu, be sogo e ra me, ba sé ngagat[10] vɔ na bol hom.

¹⁷Me tɔk bara mwa bekup bek hom, ko bemât repugu hom be feng ɛ wɛng ano.

¹⁸Ba sé gas berugu hom e tē mɛn, be ra cáca e ra vɛ.

¹⁹Ko hwo, à Dagwi Darwey, hwo kwon se yikyik na me wɛt! Hwo wɛ a gap hom, vey sɛlɛ me dey-dey!

²⁰Sey me yi e bewâl bemât repugu hom, sey neken hom yi e bevu vane!

²¹Hywit me yi e nû begukum! Sey me yi e bemus de be ra yol pep!

²²Hwà hanat a me, ko mê ha a bemat pyɛ de hwà ga ra, mê somo hwo e kwɔ̂n tulâ bemat mō, mê tē,

²³“À yin de yin e sap Dagwi Darwey, somo hin hɛ! Nɔng in hɛ nerey, à yin yére Yakɔp! Sap in hɛ, à yin BeIsrayɛl mwa!

²⁴Dagwi Darwey e byɛs kɛ e kyɛ́ ɛ bepɛng de ba sé sɔ reyɔm wɛt. Jeng de ma tosho, a wet betong, ko a lɛrɛ a me bayis mɛ wɛt.”

²⁵À Dagwi Darwey, hwà nɔng me retin na me somo hwo e nuyêl gbɔng tulâ bemat mō. E nuyêl vemo de be re a hwo fongol, mê nára a hwo nenɔrɔ de ma ga kana sira, mê nɔng nɛ.

²⁶Bepɛng bê re pyɛ́ de yê vey a yɛn. Vemo de be vɛ̀sɛ na hwo bê somo hwo. Tik na nepɔlɔ mɛn ne gwɛ̌ hɛn!

²⁷À Dagwi Darwey, mwa bemât jey bê bare na hwo. Mwa yére bemât jey yê toyo na hwo, yê gaba e cât bol mō.

²⁸Yaga hwà sé gbɔng gwɔ̀m, hwó re negwɔm e ra yére bemât jey mwa.

²⁹Bemat beting de be re be sɔ shɛrɛk bê gaba e cât bol mō; bemat de ba sé e nû reku arɔng bê vey, bê ye guduruk e nuyel mō.[11]

³⁰Bemât nezamâng vey bê re a hwo fongol, bê raa be há a nèy mɛn e ra hwo, Darwey mot.

³¹Bê ha tomong rat mō na vēmo de ba rɔngɔl nà tɔs ɛn; bê ha a yɛn, “Dagwi Darwey a ga sey ot!”