Read berom Lɛlɛ 24 Bible Online

Lɛlɛ 24 - berom bible

Lɛlɛ 24

¹Lwɛlɛ̂ Davit Vwel na kayɛ pyɛ de ya sé e ji hɛ ba sé vê Dagwi Darwey. Jey na mwa vemo de ba sé sangal e yɛ ba sé bemɛ.

²Yɛ wɛ de a yong jey o, a tɛ̀ yɛ e ra rak begbɔng berep, a lasha yɛ e ra rak nshi.

³Wa de bê simo a yɛ, na a tút e raku de Dagwi Darwey a ga kasa ɛ? Wa de ê kyɛm a re a yɛ fongol e ji lɔ mɛ ɛ?

⁴E womo de yey mɛ ya sé haalal, de vit a hɛ nà nɛn, e womo de e re a pyɛ̂ sekwit fongol kɛ e sira na bɔs wɛt.

⁵Dagwi Darwey ê sey ɛ, ê tɛ̀ a yɛ nerat, ê nɔng ɛ pyɔlɔ ryat.

⁶E yerê bemat a vemo de be vɛ̀sɛ na Dagwi wo Yakɔp, e yɛn de be re a yɛ fongol.

⁷Wunta hin ri kwɔ̂n rê fongol kuk o hwɔng, yaga na gbɔng gwɔ̀m wo nerey mwa a yel ɛ!

⁸E wa wɛ à gbɔng gwɔ̀m wo nerey mwa wane mo ɛ? Yɛ wɛ à Dagwi Darwey de a vɔk gap na reto. Dagwi Darwey, de e di wɛng e como.

⁹Wunta hin ri kwɔ̂n rê fongol kuk o hwɔng, yaga na gbɔng gwɔ̀m wo nerey mwa a yel ɛ!

¹⁰E wa wɛ à gbɔng gwɔ̀m wo nerey mwa wane mo ɛ? Yɛ wɛ à Dagwi Darwey Da Jey Mwa. Yɛ wɛ à gbɔng gwɔ̀m wo nerey mwa mo.