Read berom Lɛlɛ 25 Bible Online

Lɛlɛ 25 - berom bible

Lɛlɛ 25

¹Yi e vwɔ̂ Davit. À Dagwi Darwey, ma sé nɔng o yey hom mwa.

²Ma tɛ̀ gap e ra hwo, à Dagwi hom, Hwo tɛ̀ a me rekyen wɛt! Hwo tik vê repugu hom be dak kaà wɛng e ra me wɛt.

³Vit a hwak e ji vemo de be sɛt bayis mɛn e ra hwo de ê wok rekyen, ko e vemo de be kyɛ́ ɛn hwo bê sɔ rekyen, bê nusu na vɔ sǎn.

⁴À Dagwi Darwey, dura a me begwong mō, basa a me, na me raa vɛ.

⁵Kyè na me e gwong mō gwô tsak o, basa a me, na me kyè e gwɛ, yaga hwà sé Dagwi de e sey me. E hwo wɛ de me sɛt bayis hom e ra hwo kayɛ jeng.

⁶À Dagwi Darwey, bare na gwong de hwó wok nemwishish bemat, tanga gwong de hwà tɛ̀ yey na yɛn, ko e yunung zɔng wɛt de hwó ra ano.

⁷Yē bam a banɛn na negbarak de ma ra e jeng newen hom, ko bare na tɛ̂ yey mō vey na me, yaga hwà sé wo nerat.

⁸Ey, Dagwi Darwey a sé wo nerat, a sé cik. Yaga ano, e basa a vê banɛn gwong de gwa jam na be raa.

⁹E kyè na vemo de be jut ɛn e nû pyɛ cak wɛt, na be ra pyɛ de ya sé tyɛng; e basa a yɛn, na be raa negwɔn mɛ.

¹⁰E mwa pyɛ́ de e ra, e dura a mwa vemo de be gyenges wuna-na-sira tanga badu mɛ nerat, e ye waa a hɛn ko tyɔng wɛt.

¹¹À Dagwi Darwey, hala a me banɛn hom, mwa ano de ba sé pyak, na hwo dul mɛ reza mō.

¹²Hwô dura a kawɛ mwat de e sap o gwong de ê kyè ɛ.

¹³Ê sangal sangâl netyang, ko nèy mɛ nê re nedanelɔ vwel o.

¹⁴Dagwi Darwey e lɛrɛ a vemo de be sap ɛ ha wɛt. E tɛ̀, yɛn a tɔk retîn wuna-na-sira mɛ.

¹⁵Bayis hom ba sé e ra Dagwi Darwey kayɛ jeng, yaga ê pat me yi e segun vê repugu.

¹⁶À Dagwi Darwey, di me, tosho reyɔm hom! Ma sé nju hom zɔng, vit a sɛlɛ.

¹⁷Bɔrɔ̂k yey hom he gwɛsɛ hɛ, sey me yi e mwa yɔ́m de me sɔ!

¹⁸Di yɔ́m na zot de me sɔ! Hala a me banɛn hom mwa.

¹⁹Di bemât repugu hom de ba sé hyɔt! Be bɛɛ me ves vit a yɛnɛ.

²⁰Me jama kwɔ̂n dal na hwo. Dul me, sey me! Hwo tik, me sɔ rekyen wɛt.

²¹Ma sɛt bayis e ra hwo, na hwo tɛ̀, me sila gyat, me se cik kayɛ jeng.

²²À Dagwi, pat BeIsrayɛl yi e mwa reyɔm de be sɔ!