Read berom Lɛlɛ 26 Bible Online

Lɛlɛ 26 - berom bible

Lɛlɛ 26

¹Yi e vwɔ̂ Davit À Dagwi Darwey, dura, vit a me na nɛn! Ma sila gyat e negwɔn sangal hom, ko ma tɛ̀ gap hom e ra hwo, vit a tô yey.

²À Dagwi Darwey, ngyɛgɛt me, mara me, mara negwɔn hom mwa ngyɛtɛtɛt, na hwo di yerê mwat de ma sé.

³Hwà tɛ̀ yey na me, ko me ye bam a hɛ ko tyɔng wɛt, me sé sangal kwen yaga tsak o mō.

⁴Me wuna to na bemât nefanang wɛt, vit a pyɛ de ya wuna me na bemât nenu-neba.

⁵Me kyɛ́ me wunâ nesa na bemât nengyas, ko mê wɔ bagat na bemât neves wɛt.

⁶À Dagwi Darwey, ma ga kus vɔ hom, na me dura, vit a me na nɛn.

⁷Me gwɔsɔ gàgbang nɔrɔ mo, na me ra a hwo lwɛlɛ̂ feng, na me ha hâ mwa tomong mō ve langat.

⁸Me wok netâ duk rê fongol mō, à Dagwi Darwey, kwɔn de hwà sé sangal na gbɔng nerey mō.

⁹Hwo wey na me tanga bemât banɛn wɛt. Hwo bak ɛ neken hom na ne bemât mɔbɔ̂s bemat wɛt,

¹⁰vemo de be yongos begwong beves, ko be nɔngɔs pyɛ̂ bâng nu.

¹¹Ko me, ma sila gyat e negwɔn sangal hom. Tosho reyɔm hom, sey me!

¹²A remo, ma sé tumal tɛk. Jeng de bemat mō bê tula hɛn, mê somo hwo à Dagwi Darwey.