Read berom Lɛlɛ 27 Bible Online

Lɛlɛ 27 - berom bible

Lɛlɛ 27

¹Yi e vwɔ̂ Davit. À Dagwi Darwey, hwà sé negbey hom na mwât sey hom, ma rɔda wok bengyip mwat hwak wɛt. Hwà sé a me kwɔ̂n dal, ko mê sangal tashak.

²Jeng de bemât nengyas be hwo e ra me, be simo be wey na me, ko e yɛn bemât repugu hom o de bê ye bugurɛk, bê gaba.

³Ka mwa bemât como ba ka rɔnɔ me, nemi nê gaba a me e yey wɛt. Ka vê repugu hom ba ka hwo e ra me, ko mê rɔgɔs yey zɔng.

⁴À Dagwi Darwey, pyɛ jining zɔng de me ra won na hwo, cwey hom a yet: Me sangal e ji lɔ mō mwa neyɛnɛ̂ neken hom, na me bɛrɛng nerat mō e hwomo, na me tɔk gwong de hwó simo me raa.

⁵E jeng reyɔm hwà rɔda lɛrɛ me e buk mō, hwô dul me tyang, hwô tik me e ra tɛ̂t raku.

⁶Hwô tɛ̀, me di wɛng e ra vê repugu hom de ba gwɔrɔ me. Mê nára nenɔrɔ na yey pyɛng hyùu e buk mō; mê ra lwɛlɛ na yom, mê somo hwo.

⁷À Dagwi Darwey, wok me jeng de me yila hwō! Tosho reyɔm hom, hanat a me!

⁸Ma bare na badu mō de hwà ye, “Vey in na me.” Yaga ano, ma vey na hwo à Dagwi Darwey.

⁹Hwo kyɛ́ o nà wok me wɛt! Ma sé sam mō, ko hwó sɛlɛ me! Hwo tɛ̀ shom na hwo nɔng me ma wɛt! À Dagwi, mwât sey me, hwo ye waa, kɛ hwo ye zak a me wɛt!

¹⁰Ka da hom na de hom ba ka ye waa a me, ko hwo, à Dagwi Darwey, hwô sey me.

¹¹Dura a me begwong mō, kyè na me e gwong de gwa sé tɛk yaga vê repugu hom.

¹²Hwo tik, na me gaba e vwɔ̂ bemât repugu hom wɛt. Be yɛt nebɔs e ra me, be simo be wok a me bek.

¹³Ko ma tɔk, mê di nerât Dagwi Darwey e dem sangâl vê neken.

¹⁴Sɛt bayis mō e ra Dagwi Darwey! Rɔgɔs yey, ko hwo vɔk yey ting! Sɛt bayis mō e ra Dagwi Darwey!