Read berom Lɛlɛ 29 Bible Online

Lɛlɛ 29 - berom bible

Lɛlɛ 29

¹Lwɛlɛ̂ Davit. À yin bemat-lagwi, nɔng in Dagwi Darwey nerey, somo hin gbɔng nerey na reto mɛ.

²Nɔng in rezâ Dagwi Darwey nerey, yɛ a sé wo jɛrɛ. Ré in a yɛ fongol, jeng de ê dura nedyɛt gbɔng nerat mɛ!

³Be wok fwɔ̂ Dagwi Darwey e ra gworep. Dagwi wo gbɔng nerey a sé lulum, Dagwi Darwey a sé lulum e ra berep.

⁴Fwɔ̂ Dagwi Darwey gwa vɔk reto, gwa sila na nerey mɛ.

⁵Gwó kwɔrɔs batîn cɔ́gɔt sida, Dagwi Darwey e rùnus batîn cɔ́gɔt sida vê berakû Lɛbanɔn.

⁶E tɛ̀ berakû Lɛbanɔn be gyilsit sede nèy rɔndɔng. Rakû Hɛrmɔn wo gyilsit sede hwêy cungun.

⁷Fwɔ̂ Dagwi Darwey gwo tɛ̀sɛ negbey ne tē dɛbɛt,

⁸gwo tɛ̀sɛ hey he digis. Dagwi Darwey e tɛ̀sɛ hey Kadɛsh he digis.

⁹Fwɔ̂ Dagwi Darwey gwo tɛ̀ lyóp ye tɔs fút,[12] gwa tē jwɛ̀k a berang cɔ́gɔt. Ko mwa bemat de ba sé e duk rê fongol be gbɔ: “Bē nɔ̂ng Dagwi Darwey nerey!”

¹⁰E jeng tɛmɛ-nshi, Dagwi Darwey à kana se sangal e gwofwa negwɔm mɛ, ko a sé gbɔng gwɔ̀m nesheneshey.

¹¹Tik na Dagwi Darwey a nɔ̂ng bemat mɛ gap, a tɛ̀ a yɛn nerat, a tɛ̀ ɛn be sangal tyang.