Read berom Lɛlɛ 30 Bible Online

Lɛlɛ 30 - berom bible

Lɛlɛ 30

¹Lwɛlɛ̂ Davit yaga nzem tîk Gbɔng Duk Re Fongol jaram À Dagwi Darwey, me remo hwo, yaga hwà ga pat me yi e rezot, hwà tik bemât repugu hom, be feng ɛ wɛng wɛt.

²Ma tosho a hwo, à Dagwi Darwey, Dagwi hom, ko hwà tɛ̀ me tyang.

³Hwà nusu na me yi e kwɔ̂n bevuvwel. Ma kana se e nû reku, ko hwà to nɔng me neken.

⁴À yin bemat de yin a sé pang na Dagwi Darwey, rá in a yɛ lwɛlɛ na yōm. Feng in a yɛ, ko bare hin, a sé wo jɛrɛ.

⁵Shom mɛ ya sé kejeng tyɔng, ko nerat mɛ na sé vɔk e yɛnɛ̂ nekên mwasi. Gyeng, wot ê tosho nabwalak, ko nagasi wot ê shɛgɛsh.

⁶Jeng de vit a pyɛ de ye bɔrɔk me, ma bare, “Bê dikta me ko tyɔng wɛt!”

⁷Hwà dura nerat mō na me à Dagwi Darwey, hwà tɛ̀, me sé gak sede gwopwomol. Ko jeng de hwà kyɛ́ o nà wok me, ma wok bengyip sizɔng.

⁸Ma yila hwo à Dagwi Darwey, ma ra won na hwo sɛlɛ me, ma ye,

⁹“E yɛ̌ pyɛ de hwô sɛ̀, ka sede ma ku ɛ? E rɛ̌ de mê tɔk somo hwo, e bama de ma ga to me fongol ɛ? Revîn mwat rê tɔk ha hâ nerat mō de vit a sege a?

¹⁰À Dagwi Darwey, wet betong na me, tosho reyɔm hom, sɛlɛ me!”

¹¹Hwà ga sege lwɛlɛ̂ sin hom, gwa ga tɛ́ ɛ rɛɛ̀ yey pyɛng, hwà ga jut yɔ́m hom, ko hwà ga wɔrɔk me.

¹²Yaga ano, me ra a hwo lwɛlɛ na yom, mê man nu wɛt. À Dagwi Darwey, Dagwi hom, mê feng a hwo nesheneshey.