Read berom Lɛlɛ 31 Bible Online

Lɛlɛ 31 - berom bible

Lɛlɛ 31

¹Lwɛlɛ̂ Davit À Dagwi Darwey, a sé na hwo de me jama kwɔ̂n dal. Hwo tik, me vo rekyen wɛt! Sey me, yaga hwó ra pyɛ́ de ya sé tɛk kayɛ jeng.

²Wet betong na me, sey me dey-dey. Tik na hwo sè a me sede gbɔng fwara, kwɔn de mê dal ɛ, na hwo sey me.

³Ey mwin, hwà sé fwara hom, kwɔ̂n dal hom. Gyeng me, na hwo kyè na me, yaga na be nɔ̂ng reza mō nerey.

⁴Gyeng me yi e segun de ba ga rene yaga me, pat me tyang.

⁵Ma sé tik to hom e vwɔ mō. À Dagwi Darwey, hwo de hwó sege hwo wɛt, hwô viri me.

⁶Me bɛɛ vemo de be sap cī ves, ko me, ma tɛ̀ gap e ra Dagwi Darwey.

⁷Ma vɔk yey pyɛng, mê rɛ̌ na nzem, yaga hwà tɛ̀ yey na me. Hwà ga di yɔ́m hom, hwà tɔk pyɛ́ de ye bɔrɔk me.

⁸Hwà tik, me gaba e vwɔ̂ bemât repugu hom wɛt, hwà ga hala me washak.

⁹À Dagwi Darwey, tosho reyɔm hom, yaga ma sé sɔ rezot. Bayis hom ba sé hywiinin, ba ga tɛ́ ɛn shǔt yaga sesin, ma ga sɔ́ me vit.

¹⁰Lashê yey ha ga vo me, nepɔlɔ hom na ga tɛt ɛn yaga sesin. Gap hom ha ga tala hɛ yaga yɔ́m[13] pyak, bekup hom ba sé tɛ́ ɛn ngashashash.

¹¹Ma tɛ́ me pyɛ byɛs na bemât repugu hom, a kat me bemât vwara hom. Ma tɛ́ me pyɛ bengyip na vemo de ba tɔk me, sede ba di me e gwong, be tele hɛn me.

¹²Ba ga ye bam a me, sede ma ga peres. Ma sé sede pyɛ́ de ba ga barak.

¹³E kawɛ bak, me wokos neha show-show ne bengyip; bemât repugu hom ba ga wuna nu, ba ga yong begwong de bê mɔrɔ me.

¹⁴Ko ma tɛ̀ gap e ra hwo, à Dagwi Darwey, ma ye, hwà sé Dagwi hom.

¹⁵Pɔngɔ hom ha sé e ji vwɔ mō, sey me yi e bemât repugu hom, yi na vemo de be ro me!

¹⁶Bɛrɛng me na nerat, yaga ma sé sam mō. Sey me, yaga hwà tɛ̀ yey na me.

¹⁷Me yila hwo, à Dagwi Darwey, hwo tik, me vo rekyen wɛt, ko hwo tɛ̀ bemat beves be vo rɛ! Tik be se yuu gbak-gbak e kwɔ̂n bevuvwel.

¹⁸Bang nenu bemât bɔs vane mwa de ba sé gbàrak, tik vemo de be dak gèy, bé ha hâ byɛs e ra bemat mō, be tik.

¹⁹Nerat de hwó tɛ̀sɛ a vemo de be sap o na sé pyak. Hwó tɛ̀ a vemo de be jama kwɔ̂n dal na hwo nɛ e bayîs bemât mwa.

²⁰Hwà lɛrɛ hɛn na hwo, yi e cɛ́k de bemat be yongos, hwà lɛrɛ hɛn e buk mō yi e ryɔgɔ̂t bemat.

²¹Me somo hwo, à Dagwi Darwey! Hwà ga dura a me nerat mō, hwà ga ra a me pyɛ̂ langat, jeng de bemât repugu ba hwo e ra me, ba tɛ̀ me e tē.

²²Ma kana ye lot, ma bare, hwà ga ró me yi e nuyel mō. Ko hwà ga wok tosho hom, jeng de ma yila hwo yaga sɛlɛ.

²³Tɛ̀ in yey na Dagwi Darwey, à yin de yin a sé pang na yɛ. E gyeng vemo de be tó yey na yɛ wɛt, ko vemo de be dak kaa, e tabak hɛn sizɔng.

²⁴Mwa yin de yin e sɛt bayis e ra Dagwi Darwey, rɔgɔs hin neyey, ko yin vɔk yey ting!