Read berom Lɛlɛ 32 Bible Online

Lɛlɛ 32 - berom bible

Lɛlɛ 32

¹Lwɛlɛ̂ Davit de gwo rɔgɔm Vê wɛng a vemo de Dagwi a ga hala a yɛn banɛn mɛn, vemo de a ga ye bam na negbarak mɛn!

²Vê wɛng a vemo de Dagwi Darwey a ye, vit a hɛn na nɛn, vemo de vit a kwɛlɛng e nenu mɛn.

³Gyam na me kulu banɛn hom, bekup hom ba ga tɛ́ ɛn ngashashash, ma wosho e de rus.

⁴Nagwi na naturuk hwà ga tabak me, gap hom ha ga tala hɛ sede tîn cɔgɔt de ha ga ye nɔɔshɔsh.

⁵Yaga ano, ma kulu banɛn hom na hwo à Dagwi Darwey, ma tono na buru hom ko hining wɛt. Ma tɛ̀ e yey hom, na me ha mwa banɛn hom, ko hwà ga hala a me kayɛ pyɛ.

⁶Yaga ano, tik mwa vemo de ba sé pang na hwo bē ra won jeng de yɛn a ga tɔk banɛn de ba ra. Ano kwong, jeng de gbɔng reyɔm rê sogo, rê sɛ̀ ɛn wɛt.

⁷Hwà sé a me kwɔ̂n lɛrɛ! Hwô sey me yi e ji reyɔm, hwô tɛ̀, bemat be gwɔsɔ me na râ lwɛlɛ, yaga hwà ga sey me.

⁸Hwà ha a me, “Mê basa a hwo pyɛ́ de hwô ra, mê dura a hwo gwong de hwô kyè ɛ, ko mê tɛ̀ bayis e ra hwo.

⁹Dwa na dwa-madung ba tɔk gwong de be kyè ɛ wɛt sɛ̌ ba tɛ̀ a vɛ nerwey. Ko hwo, de hwà sé sede vɛ wɛt, ano, pyɛ cak yê mǎ hwo wɛt.”[14]

¹⁰Bemat neves bê di reyɔm pyak, ko Dagwi Darwey e tɛ̀ yey ding-ding na vemo de be tɛ̀ gap e ra yɛ.

¹¹Vɔk in yey pyɛng yaga pyɛ de Dagwi Darwey a ga ra! À yin de yin e gyeng ha mɛ, rɛ̌ hin na nzem! Rá in biibi, à yin mwa de neyey min na sé yɛt!