Read berom Lɛlɛ 33 Bible Online

Lɛlɛ 33 - berom bible

Lɛlɛ 33

¹À yin de yin e gyeng hâ Dagwi Darwey, ra in biibi, yaga pyɛ́ de a ga ra! Somo hin hɛ mwa yin de neyey min na sé yɛt!

²Dak in yōm shǐ, na yin feng a Dagwi Darwey, ra in a yɛ lwɛlɛ na yōm.

³Rá in a yɛ lwɛlɛ pwas, dak in yōm o na nzem, rɔgɔm hin lwɛlɛ, rá in biibi!

⁴Rehâ Dagwi Darwey ra sé tsak o, be tɔk tɛ̀ gap e ra mwa pyɛ́ de e ra.

⁵Dagwi Darwey e simo bemat de be ra pyɛ́ cik, de be gas a bemat shɔt e tē. E tɛ̀ yey na pyɛ de ya sé cik, na gâs shɔt e tē. E tɛ̀ yey na kawɛ mwat e jey mwa.

⁶A yong lagwi, na bwâng pyɛ́ de ya sé e ji mo yi na hanat zɔng.

⁷A tula nshî gworep e dem hining, a bang nɛ e ji begban.

⁸Tik bemât jey mwa be sap Dagwi Darwey, be wok bengyip mɛ!

⁹A hanat zɔng, ko jey ya pere hwo, a nɔng nu, ko kayɛ pyɛ ya pere tɛ́ ɛ.

¹⁰Dagwi Darwey e tɛ̀ pyɛ́ de yére bemât jey ye yong e neyey mɛn, ye tɛ̀ to wɛt, e lashe yɛ zɔng.

¹¹Ko pyɛ́ de yɛ pyɛ mɛ e yong, yê tɛ̀ to, pyɛ́ de e simo râ yɛ, yê nàra vɔk e yɛnɛ̂ jey.

¹²Vê wɛng a bemat de Dagwi Darwey a sé Dagwi mɛn, vê wɛng a vemo de a ga kasa, na be sè bemɛ.

¹³Yi e hwomo e lagwi, Dagwi Darwey e bɛrɛng bemasi mwa.

¹⁴E bɛrɛng hɛn mwa de ba sé sangal e jey yi e kwɔ̂n sangal mɛ.

¹⁵Yɛ e dun barê yey mɛn wɛt, e tɔk tomong mɛn mwa de be ragas.

¹⁶E jeng como, gbɔng gwɔ̀m ê di wɛng yaga gâp bemat mɛ zɔng wɛt, besuga bê sey neken mɛn yaga gap mɛn zɔng wɛt.

¹⁷Bedwa bê vey na wɛng wɛt, gap mɛn mwa hê sey bemât laga vɛ wɛt.

¹⁸Ko Dagwi Darwey e gyeng vemo de be sap ɛ, vemo de ba sɛt yey mɛn e ra nerat mɛ.

¹⁹Ê sey ɛn yi e reku, ê gyeng neken mɛn e jeng vyong.

²⁰À Dagwi Darwey, wot e sɛt bayis mot e ra hwo, hwo wɛ hwó sɛlɛ hot, hwó dul ot sede ruga.

²¹Yey mot ya pɛngɛ na hwo, yaga wot a tɛ̀ gap mot e ra hwo, wo jɛrɛ.

²²À Dagwi Darwey, tɛ̀ yey na wot, yaga wot e sɛt yey e ra hwo!