Read berom Lɛlɛ 34 Bible Online

Lɛlɛ 34 - berom bible

Lɛlɛ 34

¹Lwɛlɛ̂ Davit. A ra gwɛ e bama de Abimɛlɛk a ro ɛ, yaga á ra sede e tē how. Me feng a Dagwi Darwey kayɛ jeng, me sang tik nà somo hɛ wɛt!

²Mê dak kaa mwa pyɛ́ de Dagwi Darwey a ga ra. Jeng de bepɛng bê wok pyɛ de me ha, yey mɛn yê pɛngɛ.

³Há in nerêy Dagwi Darwey tanga me, tik wot mwa wot a remo hɛ!

⁴Ma ra won na Dagwi Darwey, ko a ga wok me, a ga ro a me mwa bengyip.

⁵Vemo de be sɛt bayis e ra yɛ, bê se vwɛshɛk, rekyen rê kyiri hɛn wɛt.

⁶Ma sé pyɛ cak wɛt, ko ma tosho na Dagwi Darwey, yɛ a wok me, a pat me yi e reyɔm hom mwa.

⁷Tom Dagwi Darwey e dul vemo de be sap ɛ, e seres hɛn yi e gawey.

⁸Tɔk in pyɛ min wɔgɔ, Dagwi Darwey a sé wo nerat. Vê wɛng a vemo de be jama kwɔ̂n dal na yɛ!

⁹Tik na vemo de ba sé sangal e ji nesa na Dagwi Darwey, be sap ɛ! Vemo de be sap ɛ bê bidɛ pyɛ cak wɛt.

¹⁰E jeng e jeng, begukum be ka tɛ́ ɛn vit à gap yaga vyong, ko vemo de be vey na Dagwi Darwey bê bidɛ pyɛ ryat wɛt.

¹¹Wet in betong na me, à nèy hom, me basa a yin gwông sâp Dagwi Darwey.

¹²Sede yin e simo wok netâ neken, sede yin e simo neken nelis na pyɛ́ ryat,

¹³ko vɔk in nenu gak, yin ha ha ves kɛ yin vɛ́sɛ bɔs wɛt.

¹⁴Tele hin ragâs neves, ko ra in tomong rat e negya, tē in ngyɛ́k, na yin a sangal tyang na kawɛ mwat.

¹⁵Dagwi Darwey e bɛrɛng vemo de ba sé bemɛ, jeng de ba tosho a yɛ, e hanat a yɛn.

¹⁶Ko e ra repugu na vê de be ra pyɛ́ vyes, jeng de be kushu, ê tɛ̀ mwat hwak a ka bare na yɛn wɛt.

¹⁷Sede bemât Dagwi Darwey ba tosho a yɛ, e wok ɛn, ko e pat ɛn yi e reyɔm mɛn mwa.

¹⁸Dagwi Darwey a sé bagat na vemo de a sé a yɛn kpɔrɔk, ko e seres vemo de ba ga kana ye waa.

¹⁹Womo de a sé wo Dagwi Darwey e bidɛ sɔ reyɔm ding-ding wɛt, ko yɛ e sey ɛ kayɛ jeng.

²⁰E gyeng ɛ pyɛt, vit a gwong de be ka kwɔrɔ kup mɛ hwak.

²¹Nengyas bemat beves nê wey na yɛn, bê gang vemo de be ra repugu bemât Dagwi na shɔt reku.

²²Dagwi Darwey ê sey nekên vemo de ba sé bemɛ, vit a mwat de ê jama kwɔ̂n dal na yɛ de ê wey.