Read berom Lɛlɛ 35 Bible Online

Lɛlɛ 35 - berom bible

Lɛlɛ 35

¹Lwɛlɛ̂ Davit À Dagwi Darwey, rá repugu na vemo de be ra repugu na me, rá yol na vemo de be ra yol na me!

²Jut ruga na pyɛ̂ como mō, na hwo vey sey me!

³Jut bara tanga tyem mō, na hwo hwo mɛ bemat de be ro me, ko vo a me nu wɔgɔ, hwà rɔda sey me.

⁴Tik vemo de be jama neken hom be ye det na rekyen! Tik vemo de be re bol hom, be tele na rekyen.

⁵Tik be sè sede byɛmɛ de gul gwo pɛsɛl, ko tom-lagwi a raa a ró ɛn.

⁶Tik begwong mɛn be sè mwangalang, be se tɔlɔt, jeng de tom-lagwi a sé ro ɛn o.

⁷Ba rene segun yaga me, vit a tin, ba cing vɔng ciwil, na me gaba e ji mo.

⁸Tik gawey he hwo e ra yɛn hák, tik be hwo e segun de ba rene mo, tik be gaba be wey e vɔng de ba cing o.

⁹Ko ma rɔda rɛ̌ na nzem yaga hwo, à Dagwi Darwey, ma rɔda ra biibi, yaga hwà ga sey me.

¹⁰Mê ye na yey hom mwa, “Vit a hwak sede hwo, à Dagwi Darwey!” Hwó dul vemo de vit a hɛn na gap yi e vɔ vê gap, hwô dul bepɛng yi e vemo de be midra a yɛn.

¹¹Bemat neves be nɔng nuha bɔs e ra me, be tɛ̀sɛ kun hom e ra nɛn de ma ka tɔk ɛ pyɛ cak wɛt.

¹²Be tala me na pyɛ́ vyes e tô nerat, be tik me vit à mwat.

¹³Ko me, jeng de ba rō ɛn, ma tɛ̀ berugû sesin, ma tak a tó hom na tîk rê pyɛ́, ma ye zip e de râ won,

¹⁴tyɛng sede me ra won yaga sa hom, kɛ gwa hom. Ma kyè yɔɔm, sede mwat de a bidɛ dē mɛ, ma ye det e de sesin.

¹⁵Ko yɛn, jeng de ma ye bugurɛk, ba gwɔrɔ me, ba shɛgɛsh. Bemat zɔng, ma ka tɔk ɛn mwa wɛt, ba rimi hɛn e de lɛ́lɛ me.

¹⁶Be sǎ e de mok me, be shɛgɛsh me, sede ba de di me, ko be rɔgɔs bayis mɛn.

¹⁷À Darwey, e yɛ̌ jeng de hwô de ba di ɛ? Sey me, jeng de ba hwo e ra me, sey me yi e begukum vemo!

¹⁸Ko mê feng a hwo e nuyêl regyɛng bemat mō, mê dak kaa e ra pyɛ́ de hwà ra e nuyel mɛn mwa.

¹⁹Hwo tik bemât repugu hom de be vɛ́sɛ bɔs be dak gèy e ra me wɛt, bé bɛɛ me ves, be tē mwɛt a bayis, vit a tin.

²⁰Be ha hâ netyang wɛt, sɛ̌ be yɛt nebɔs e ra vemo de be simo sâ netyang.

²¹Be nása vɔ e ra me, be tē, “Yàa! Wot a ga di pyɛ de hwà ra!”

²²Ko hwo, à Dagwi Darwey, hwà ga di kayɛ pyɛ! Gabɔk, hwo wey ɛ yuu kɛ hwo sè yikyik wɛt!

²³Sogo, à Dagwi hom, na hwo dul me! Áaa, à Darwey, sogo, na hwo tumal a me!

²⁴À Dagwi Darwey, hwà sé wo tsak o, dura, vit a me nà nɛn! Hwo tik bemât repugu hom be shɛgɛsh me wɛt.

²⁵Hwo tik ɛn, be ye, “Wot a ga yɛnɛ na yɛ! Ey yàa! E pyɛ de wot a simo a yane!”

²⁶Tik vemo de be feng, yaga me sɔ reyɔm, be ye det, be tele na rekyen! Tik a sè a vemo de be tâng bato mɛn ba dal me, gbogodok, ko rekyen re kyiri hɛn.

²⁷Tik vemo de be simo, me nusu hyɔ́l yi e shɔt, be vɔk yey pyɛng, be ra biibi, be tē, “Dagwi Darwey a sé wo nerey! Yey mɛ ya pɛngɛ na wɛ̂ng sam mɛ.”

²⁸Ko me à me, mê ha hâ tsak o mɛ, mê somo hɛ mwa wosho.