Read berom Lɛlɛ 36 Bible Online

Lɛlɛ 36 - berom bible

Lɛlɛ 36

¹Lwɛlɛ̂ Davit, sam Dagwi Darwey. Gwá sè e vwɔ̂ mwât kyé na lɛlɛ. Bemât banɛn be wok bengyip Dagwi wɛt, banɛn ba ga tɛ́ ɛn a yɛn rebek.

²Yɛn e bɛrɛng bato mɛn ba sé pyɛ cak, yaga ano, be tɔk di neves mɛn, na be kyɛ́ ɛn nɛ wɛt.

³Ha mɛn ha sé ves, ha sila na bɔs. Pyɛ́ de yɛn e ra ya vɔk to wɛt, ya sé ryat wɛt.

⁴Yɛn e yongos begwong beves ka ba ka sé e dyɛngɛ. Yɛn e tɛ̀ bato mɛn e de raà gwong de gwa sé rwat wɛt, bé kyɛ́ ɛn nà doyo yi e neves mɛn.

⁵À Dagwi Darwey, hwà tɛ̀ yey na bemat bagat wɛt, hwô sang gas cáng na yɛn wɛt.

⁶Hwó ra shɔt tsak o kayɛ jeng, hwó sege hwo wɛt sede begbɔng beraku, sede retîs gworep. Hwó gyeng bemasi tanga ngyāma mwa.

⁷À Dagwi, be tɔk mara tɛ̂ yey mō na sɛ́ ɛ? Vit a pyɛ! Hwó dul bemasi, sede congot ye gunung nèy yɛ.

⁸Hwó nɔngɔs hɛn pyɛ̂ re shɛrɛk e lɔ mō, ko nerat mō na turu hɛn sede nshî ceere de ne kwɔshɔ yey.

⁹Hwo wɛ hwà sé tîs neken, a sé e negbey mō de ne nɔ́ng ot negbey.

¹⁰Rē nuyel na tɛ̂ yey na vemo de ba tɔk o, ko dura nerat mō na vemo de neyey mɛn na sé yɛt.

¹¹Hwo tik vemo de be tos bato mɛn be hwo e ra me wɛt, dul bemat beves, be kwon ro me wɛt arɔng.

¹²Di, bemat beves ba ga gaba! Ba sé tɔɔlɔl e vwel, vit a sogo!