Read berom Lɛlɛ 37 Bible Online

Lɛlɛ 37 - berom bible

Lɛlɛ 37

¹Lwɛlɛ̂ Davit. Hwo bɔrɔk tó mo yaga bemât nengyas kɛ hwo mara yis, jeng de pyɛ́ ya sé kyè tyɛng na yɛn wɛt.

²Bê pere wey sede sɔng de gwo hworok, bê ku e ji jeng sede berang de ba wɔgɔm hɛn.

³Tɛ̀ gap mō e ra Dagwi Darwey, ko hwo rá pyɛ́ de ya sé naka. Yi ano, hwô nàra e ji sevwel o, hwô sangal tyang.

⁴Tik na Dagwi Darwey a sè tîn yey pyɛng mō, ko yɛ a rɔda nɔng o pyɛ́ de yey mō ye simo.

⁵Gáng a Dagwi Darwey pyɛ́ de ya sé a hwo negbang, tɛ̀ gap mō e ra yɛ, ko a rɔda sɛlɛ hwo.

⁶Ê dura dɛdɛrɛng, vit a hwo nà nɛn, ê tɛ̀, be di wɛshɛrɛk, hwà tumal e ra tsak o.

⁷Yɛklɛ hwo e nuyêl Dagwi Darwey, niri, na hwo di pyɛ de ê ra. Hwo bɔrɔk tó mō wɛt yaga vemo de be yong begwong beves, ko be di wɛng.

⁸Hwo wok shom kɛ hwo tik nehywɛ mō ne sogo wɛt, hwo bɔrɔk tó mō yaga bemat beves wɛt. Ka ano wɛt, hwô sɛ̀ to mō e ji renɛn.

⁹Bê ro bemât nengyas yi e vwel o, ko vemo de be sɛt bayis e ra Dagwi Darwey bê re nedanelɔ hɛ.

¹⁰Bemat beves bê ka wul kwɔn hak wɛt. Ka ba ka jama hɛn, bê sɛ̀ ɛn wɛt.

¹¹Ko vemo de be bɛrɛng hɛn ba sé pyɛ cak wɛt bê vɔk sevwel o, bê bidɛ pyɛ cak e ji sangal mɛn wɛt.

¹²Wo neves e yong begwong beves yaga mwat rwat, e pus ɛ hɛ.

¹³Ko Darwey e shɛgɛsh hɛ, yaga a tɔk, tûk yɛrɛ̂ shɔt mɛ ha ga vey lɛs.

¹⁴Vê neves be hwɔlɔ bewal mɛn, bé tē naw a begbang mɛn, na be wey na bepɛng tanga vemo de be jama sɛlɛ, na be mɔbɔs vemo de be ra pyɛ́ de ya sé cik.

¹⁵Ko bewal mɛn o bê re ɛn, ko bê kwɔrɔs begbang mɛn o.

¹⁶Kepyɛ tyɔng e vwɔ̂ mwat de e gyeng hâ Dagwi ka dal mwa nedanerêy bemat beves,

¹⁷yaga Dagwi Darwey ê wey na gâp bemat beves o, ko ê gwɛ̌ gâp vemo de be gyeng ha mɛ mo.

¹⁸E gyeng vemo de be sila gyat, ko pyɛ̂ nedanelɔ de a nɔng ɛn yê se myɛn gbak-gbak.

¹⁹Bê wok rekyen e jeng reyɔm wɛt, bê vɔk pyɛ́ de yê vey a yɛn e jeng vyong.

²⁰Ko bemat beves ba rɔda kushu, bemât kyɛ́ ɛn Dagwi Darwey bê wey sede sɔng e hey, bê vuru hɛn sede kyeng de ha ye shung.

²¹Mwat vwes e hwɔp pyɛ, ko e tala wɛt, ko mwat de e gyeng hâ Dagwi e viri vwɔ, a sé washak à hɛ.

²²Vemo de Dagwi Darwey a tɛ̀ a yɛn nerat, yɛn vɛ bê re nedanelɔ vwel o, ko vemo de a kyini hɛn, bê wey na yɛn hywiri.

²³Ka sede negwɔn mwat ne pɛngɛ a Dagwi Darwey yey, ê gyeng begwông mwat o naka.

²⁴Ka a ka tiri bwol, ê gaba wɛt, yaga Dagwi Darwey a vɔk ɛ gak.

²⁵Me, a remo ma ga kwop, ko yimo me wen, ma ga di Dagwi Darwey a ye waa a mwat wɛt womo de e gyeng ha mɛ, ma ga di nèy mɛ ne ra wôn pyɛ̂ re arɔng wɛt.

²⁶Kayɛ jeng e viri vwɔ, e nɔngɔs washak, e hwɔpɔ̂s behak arɔng, ko nèy mɛ na sé nèy nerat.

²⁷Tele hwo rágas neves, ko rá tomong rat e negya, ko hwà rɔda sangal tyang nesheneshey.

²⁸Dagwi Darwey e simo, be gas ha e tē, ko e ye waa a vemo de ba sé pang na yɛ wɛt. E dul ɛn kayɛ jeng, ko ê wey na yére bemat beves vit.

²⁹Bemat de be gyeng ha mɛ, ba rɔda re nedanelɔ vwel o, ko bê sangal ɛ nesheneshey.

³⁰Mwat rwat e vos badu barat, e ha pyɛ́ de ya sé tyɛng.

³¹E gyeng badu Dagwi e ji yey mɛ, yaga ano, ê ye rɛng yi e gwong rwat wɛt.

³²Bemat beves be wɛrɛm bemat berat, be jama, na be mɔrɔ hɛn,

³³ko Dagwi Darwey ê tik bemat mɛ be gaba e vɔ mɛn kɛ be gang ɛn na shɔt wɛt.

³⁴Sɛt bayis mō e ra Dagwi Darwey, gyeng badu mɛ. Ê nɔng o nerey, ê tɛ̀, hwo re nedanelɔ vwel o, hwô di de bemat beves bê wey hywiri.

³⁵Ma ga di bemat de ba paa neves, ba tɛ̀ nemi na gaba a bemat e yey, ko kayɛ pyɛ yá kyè a yɛn tyang sede cɔ́gɔt de ya sɛ̀ fongol rwat.

³⁶Ko e bamâ jeng de ma to toyo, ma di ɛn wɛt, ma jama, ko vit a hɛn.

³⁷Bɛrɛng hin bemat de ba sila gyat, de ba vɔk tsak o, ko yin ê di, bemat de be simo sangâl netyang bê sɛ̀ yere.

³⁸Ko bê wey na bemât banɛn vit, ko bê tɛt ɛ yere mɛn wɛt.

³⁹Dagwi Darwey e seres bemat de be gyeng ha mɛ, ko e dul ɛn e jeng gwazigit.

⁴⁰E sɛlɛ hɛn, e gyep hɛn. E sey ɛn yi e vɔ bemat beves, yaga yɛn e sɛsɛm kwɔ̂n dal na yɛ.