Read berom Lɛlɛ 38 Bible Online

Lɛlɛ 38 - berom bible

Lɛlɛ 38

¹Lwɛlɛ̂ Davit de a ra, yaga na Dagwi a bare na yɛ. Gwá sè e vwɔ̂ mwât kyé na lɛlɛ. À Dagwi Darwey, hwà sé ra shom, hwà sé tabak me. A ga vey ano! Tik me!

²Hwà ga mǎ me na ket mō; hwà ga nɔrɔs me vwɔ.

³Yaga shom mō, dem hak ha to sé nang wɛt, mwa nedem hom na ga tɛ́ ɛn jwɛɛnɛn yaga banɛn hom.

⁴Neburu hom na ga sɔ a me to, na sé a me pyɛ nedirik de mê kyɛm me jut wɛt.

⁵Má ra netɔ̌n, ma jut o na jɔgɔ, yaga ano, baram hom ba ga bɔsɔ bé ro nesang.

⁶Ma ga ye nguk, ma ga tɛ́ me gbɛrɛk, ko me wosho e de tosho.

⁷Rebek hom ra fes sede kya, dem hak ha to sé nang wɛt.

⁸Ma ga sɔ me, vit a bwâng gap, ko ma ga tɛ́ me buruk, yey hom ye bɔgɔs, me rus yaga nepep.

⁹À Darwey, hwà tɔk pyɛ de ma vɔk cwey yɛ, hwà ga wok rus hom.

¹⁰Nesong né rasa a me, gap hom ha ga tala hɛ, bayis hom ba ga tɛ́ ɛn hywiinin.

¹¹Besa hom tanga bemât vwara hom be vey bagat na me wɛt yaga baram hom, belɔ hom mwa ba ye jaram à me.

¹²Vemo de be simo wey na me be rene bagun, ko vemo de be simo be mǎ me be tɛsɛ a me bengyip wey na me. Mwa wosho be yong pyɛ́ vyes vey sɛ̀ me.

¹³Ko ma sé sede kpey, vit à wok ha, ma sé sede tɔn, vit a tɔk ha.

¹⁴Ey, ma sé sede mwat de e wok ha wɛt, ko e tɔk toyo na hɛ wɛt.

¹⁵Me sɛt bayis e ra hwo, à Dagwi Darwey, Dagwi hom, hwo wɛ de hwô hanat e to hom.

¹⁶Ma ye, “Hwo tik vê repugu hom be feng yaga reyɔm de me sɔ kɛ be dak kaa e ra gaba hom wɛt!”

¹⁷Ma sé e ji nepep kayɛ jeng, ma sé lɛs e ra gaba.

¹⁸Ma sé kulu banɛn hom, me lashe yey yaga pyɛ́ de ma ra.

¹⁹Vê repugu hom de be simo mɔrɔ me bé wok na gap, pyak ba sé de be bɛɛ me ves, vit à tin.

²⁰Be tala me na pyɛ́ vyes e tô nerat, be kyɛ́ ɛn me, yaga me tē ngyɛ́k na me ra pyɛ́ ryat.

²¹À Dagwi Darwey, Dagwi hom, hwo ye waa a me kɛ hwo sè yikyik na me wɛt!

²²À Darwey, mwât sey me, vey sɛlɛ me dey-dey!