Read berom Lɛlɛ 39 Bible Online

Lɛlɛ 39 - berom bible

Lɛlɛ 39

¹Lwɛlɛ̂ Davit de a ra a Yɛdutun.[15] Gwá sè e vwɔ̂ mwât kyé na lɛlɛ. Ma ga tik e yey hom, mê tē naka, na me kwon ra renɛn yi na neha hom wɛt. Mê bang nu hom yuu, jeng de bemat beves ba sé bagat.

²Ma saa yuu sana hanat pyɛ cak, ko ha sɛlɛ me wɛt. Yɔ́m hom he gwɛsɛ hɛ sedesi.

³Yey hom ya sila na bɔrɔk, a sé sede kya he re me, ko ma hwo hanat, ma ye,

⁴“À Dagwi Darwey, dura a me jeng de neken hom nê tala hɛ, tik na me tɔk bwang nepɔlɔ de na rɔngɔl ɛ. Ano de mê tɔk kejeng de ka tɛt a me.

⁵Di, neken de hwà nɔng me, mê pɔl ba wɛt, nepyak nepɔlɔ hom na sé a hwo pyɛ wɛt. Mwin, nekên mwasi na sé sede nesong zɔng,

⁶ne vey, ne tala hɛ sede rezina. Mwa ano de e tē gàk e pyɛ́ pyak, ko ya sé yapyi zɔng. E kuyɛ e de tulâ yas, ko a tɔk kɛ e wa de ê vɔk yɛ wɛt.

⁷“Ko sɛ̌ a remo, à Darwey, sɛ́ yɛ de me sɛt ɛ yey ɛ? A sé e ra hwo de me tɛ̀ gap!

⁸Sey me yi e banɛn hom mwa! Hwo tik vemo de be gyeng ha mō wɛt be byɛs me wɛt.

⁹Ma rɔda sǎ yuu, mê ye pyɛ cak wɛt, yaga e hwo wɛ de hwà tɛ̀, ma sé sɔ reyɔm ano.

¹⁰Tik tabak me! Ma ga tɛ́ me hywiri yaga nɔrɔs vwɔ mō.

¹¹“Hwó tabak ko hwó gyong bemasi yaga banɛn mɛn, hwó wey na pyɛ́ de ba dal na tɛ̂ yey na yɛ, sede kǔt de gwo lashe pyɛ́. Mwin, neken mwasi na sé sede nesong zɔng.

¹²“À Dagwi Darwey, wok won hom, wet betong na sesin hom! Hwo tik, na me tosho wɛt, vey na hwo sɛlɛ me. Ma sé kwɛnɛt mō, ma sé sangâl rekyen, sede remo de bedabeda mot bà kana sè.

¹³Tik bɛɛ me muu, na me to vɔk yey pyɛng gyam na me kyè, me to me ba se wɛt.”