Read berom Lɛlɛ 40 Bible Online

Lɛlɛ 40 - berom bible

Lɛlɛ 40

¹Lwɛlɛ̂ Davit. Gwá sè e vwɔ̂ mwât kyé na lɛlɛ. Ma niri e de gyêng sɛlɛ yi na Dagwi Darwey, a de doyo, a hwo wok sesin hom.

²A hwɔltɔ me yi e ji revɔng reku, a pat me yi e ji bwɔrɔ̂k meetet, a tik me tyang e ra gbondong, a remo, me tɔk kyè, vit a tē tarak.

³A tɛ̀ lwɛlɛ pwas e nu hom, na me somo hɛ mɛ, yɛ Dagwi mot. Pyak bê wok, bê di, ko bê sap ɛ, ba rɔda tɛ̀ gap mɛn e ra Dagwi Darwey.

⁴Vê wɛng à vemo de be tɛ̀ gap e ra hwo à Dagwi Darwey, ko be doyo vɔk e pyɛ̂ sekwit kɛ be wuna hɛn na vemo de be sap cī wɛt.

⁵À Dagwi Darwey, Dagwi hom, hwà ga ra a wot pyɛ́ pyak, vit a hwak de a sé sede hwo! Begwong mō de hwà yong na pyɛ̂ langat de hwà ra — me kyɛm me ha e ra yɛ mwa wɛt, nepyak o na kat sizɔng!

⁶Hwó vɔk cwey nɔrɔ̂ yas de be yɛt tanga nenɔrɔ nehak wɛt, hwó simo, be nára a hwo nɔrɔ̂ yas burang kɛ nɔrɔ̂ fûng banɛn wɛt. Ko hwà ga nɔng me betong, na me bin wok o.

⁷Yaga ano, ma ye, “Ma sé e yong me, na me ra pyɛ de hwo simo me ra, sede remo de bà jɛk e ji Bwok-basa Badu.”

⁸À Dagwi hom, ma vɔk cwey râ pyɛ́ de hwo simo, ma vɔk basa mō e ji yey hom.

⁹À Dagwi Darwey, ma ha yɛgɛt yat de hwà sey ot e ji gbɔng tulâ bemat mō, hwà tɔk, mê tik nà ha hɛ wɛt.

¹⁰Hwó dura a me nerat mō, ma gunung nɛ e gèy yaga tó hom wɛt, ko ma ha e ra tsak o mō ma saa yuu wɛt, ko ma ye, hwó tɛ̀ yey na wot, hwó ye waa a hot ko tyɔng wɛt.

¹¹À Dagwi Darwey, ma tɔk, hwô tik nà wok nemwishish hom wɛt. Me sǎ tyang kayɛ jeng, yaga hwó tɛ̀ yey na me, hwó ye waa a me ko tyɔng wɛt.

¹²Reyɔm detidetu ra bang me, ra dal gâp bara! Banɛn hom ba kyiri me, me tɔk to di jey wɛt. Ba dal nepyak setôt rato hom, a ga tɛ́ a me gbɛrɛk.

¹³À Dagwi Darwey, gabɔk wɛt, sey me! Vey sɛlɛ me dey-dey!

¹⁴Tik be dɔnɔ vemo de be jama be mɔrɔ me, nerey mɛn ne gaba. Tik vemo de be feng yaga reyɔm de me sɔ be vo rekyen be bele.

¹⁵Tik vemo de be feng ɛ wɛng e gaba hom, be man nenu na rekyen.

¹⁶Ko mwa vemo de be simo, be se bagat na hwo, tɛ̀ ɛn, be vɔk yey pyɛng na nzem! Tɛ̀ vemo de be feng, yaga hwà sey ɛn, be dopse tē, “Dagwi Darwey a sé wo nerey!”

¹⁷Me, ma sé pwɛng, me jama sɛlɛ, hwo kwon ye bam a me wɛt! À Darwey, Dagwi hom, hwà sé mwât sɛlɛ na mwât sey hom. Vey sey me dey-dey!