Read berom Lɛlɛ 41 Bible Online

Lɛlɛ 41 - berom bible

Lɛlɛ 41

¹Lwɛlɛ̂ Davit. Gwá sè e vwɔ̂ mwât kyé na lɛlɛ. Vê wɛng a vemo de be bare na bepɛng! E jeng reyɔm, Dagwi Darwey ê sey ɛn,

²ê gyeng ɛn, ko ê tik ɛn beken. Ê nɔng ɛn wɛng e vwel o, ê tik ɛn, be gaba e vwɔ̂ vɛ̂ repugu mɛn wɛt.

³Jeng de be rō ɛn, ê tɛ̀ ɛn tyang, ko ê turu hɛn.

⁴Ma ye, “À Dagwi Darwey, ma ga ra a hwo nɛn. Tosho reyɔm hom, na hwo tɛ̀ me tyang!”

⁵Bemât repugu hom be tē naka na me wɛt, be tē, “E ba ku nayu ɛ, na be ye bam na yɛ ɛ?”

⁶Behak mɛn be vɛ̀sɛ tang me show e rak o zɔng, ko e neyey mɛn be tulsa neha neves e ra me, e bama mo, be kyě bere nɛ̀ kagwa.

⁷Mwa vemo de be ra repugu na me be ha show show e ra me, be bare, rɔ hom ha sé ves sizɔng.

⁸Be tē, “A vɔk rɔ ves, ê sang to sogo wɛt!”

⁹Ma kana tɛ̀ gap e ra gbɔng sa hom, womo de a ga re pyɛ́ e shi hining na me, ko mwa ano, a ga doyo e ra me.

¹⁰Wok nemwishish hom à Dagwi Darwey! Toyo a me na netyâng rebek hom, na me tala bemât repugu hom o.

¹¹Ko jeng de bê to dak kaà wɛng e ra me wɛt, mê tɔk, yey mō ya pɛngɛ na me.

¹²Hwó sɛlɛ me, yaga me sila gyat, ko hwó tik, na me se bagat na hwo neshey gbak-gbak.

¹³Bē somo Dagwi Darwey, Dagwi wo BeIsrayɛl, a remo na e ngamo nuyel gbak-gbak! Ano, a sè ano!