Read berom Lɛlɛ 42 Bible Online

Lɛlɛ 42 - berom bible

Lɛlɛ 42

¹Lwɛlɛ yaga ruhûp Kora de gwo rɔgɔm. Gwá sè e vwɔ̂ mwât kyé na lɛlɛ. Sede remo de vow wo hashak nshî sɔ, ano de me wok cwey mō à Dagwi.

²Ma vɔk yêy hwɔshɔ mō à Dagwi wo neken. E yɛ̌ jeng de mê ve di bayis mō ɛ?

³Nagwi na nabwalak ma sé tosho, nemwishil hom nɛ à pyɛ̂ re hom, yaga bemât repugu hom be rangsal me kayɛ jeng, be tē, “Dagwi mō mo a wɛ ɛ?”

⁴Yey hom ye lɔl, sede me bare na jeng de ya ga kwey. Ma kyè tanga regyɛng bemat mō vɔk e lɔ mō, ma kyè e yêl rwâng bemat de ba sé ra nzem, ko wot a ra biibi, wot a somo hwo.

⁵Sɛ́ ya tɛ̀, a yang me yɔɔt ɛ? Sɛ́ ye bɔrɔk me ano ɛ? A jam, me sɛt yey e ra hwo! Ey, mê somo hwo gbak, hwo, mwât sey hom na Dagwi hom.

⁶A remo, a yang me yɔɔt, ko bare hom ha doyo vɔk na hwo yi e ngamo de ma sé ɛ, e vwel de Rɔt Yɔrdan ha pɛrɛ, e berakû Hɛrmɔn na Mizar.

⁷Nerɔt na gwɔrɔ me, hwà tɛ̀ nɛ, ne lulum. Bagûng nshi be tē gwolom, be tē funglang e ra me, nshi mo na ga sɔ to hom hywiri!

⁸Kahɛ tuk, Dagwi Darwey e dura a me nerat mɛ, ko me ra a yɛ lwɛlɛ naturuk, me ra a yɛ won, yɛ Dagwi de a nɔng me neken.

⁹Ko mê yang yɛ de a sé a me kwɔ̂n dal, “Sɛ́ ya tɛ̀, hwà ye bam à me ɛ? Yaga sɛ́ de me sɔ reyɔm ɛ? Yaga sɛ́ de hwó tik vê repugu hom be tak a me ɛ?”

¹⁰Be haras a me, be nàra e de tang me, “Dagwi mō mo a wɛ ɛ?” A vɛ̌ sé a me, sede be bosot me.

¹¹Sɛ́ ya tɛ̀, a yang me yɔɔt ɛ? Sɛ́ ye bɔrɔk me ano ɛ? A jam, me sɛt yey e ra hwo! Ey, mê somo hwo gbak, hwo, mwât sey hom na Dagwi hom.