Read berom Lɛlɛ 44 Bible Online

Lɛlɛ 44 - berom bible

Lɛlɛ 44

¹Lwɛlɛ yaga ruhûp Kora de gwo rɔgɔm. Gwá sè e vwɔ̂ mwât kyé na lɛlɛ. À Dagwi, bedabeda mot bà ga ha a wot, wot à ga wok na betong mot, gbɔng pyɛ́ de hwà ra a yɛn e jeng mɛn.

²Hwo pyɛ mo, hwà ró yére bemât jey, hwà tɛ̀ bemat mō e ji vwel mɛn. Hwà tabak yére mo, ko hwà tɛ̀ bemat mō be sɛ̀ nerat.

³A sé na bewal mɛn de ba re mɛ̀ vwel o wɛt, ba re hɛ na gâp to mɛn arɔng wɛt. Ko ba re hɛ yi na gbɔng reto mō, yaga hwà sè tanga yɛn, ko hwà tɛ̀ yey na yɛn.

⁴À Dagwi, hwà sé gbɔng gwɔ̀m hom, hwó tɛ̀ yére Yakɔp, bemat mō, be di wɛng.

⁵A sé yi na gbɔng reto mō de wot ê lasha vê repugu mot e gwat, ko wot ê bɔrɔs hɛn.

⁶Me tɛ̀ gap e ra gbang hom wɛt, a sé e wal hom de wo nɔng me wɛng wɛt.

⁷Ko hwo de hwó sey ot yi na vê repugu mot, hwó tɛ̀ ɛn, be sɔ rekyen.

⁸À Dagwi mot, wot e dak kaa na hwo kayɛ jeng, wot e feng a hwo gbak-gbak.

⁹Ko di, hwà ga ye zak a hot, hwó to hwo kyè tanga bemât como mot wɛt, ko hwà ga tik wot a sɔ rekyen.

¹⁰Hwà tɛ̀ wot a tele yi e nuyêl vemo de be bɛɛ hot ves, ko ba hashe pyɛ́ de ya sé myot.

¹¹Hwà tik, be yɛt ot sede vyēl, hwà shara hot e tê yére dyuk.

¹²Hwà row bemat mō e nû kedyam hyet, hwà ka re ɛ pyɛ cak wɛt.

¹³Hwà tɛ̀, bemât vwara mot be tabas a wot nengyas, bē lɛlɛ hot, be raa shɛgɛsh hot.

¹⁴Yére dyuk ye jut ot pyɛ jɔgɔ, ye tē cwɛ̀ɛp a hot.

¹⁵Kayɛ jeng, me wok bemât repugu mot de be haras, be shɛgɛsh, be bɛɛ hot ves, ko me wok rekyen, me tē det yaga rɛ.

¹⁷Pyɛ́ yemo mwa ya té na wot, mwa ano de wot a ye bam na hwo kɛ wot a kwɔrɔ sira de hwà wuna na wot wɛt.

¹⁸Wot a doyo a hwo ma, kɛ wot a ye rɛng yi e gwong mō wɛt.

¹⁹Ko hwà barak hot e hêy gbingiring, hwà bang ot na lwīl mwangalang.

²⁰Ka wot a ye bam a hwo, à Dagwi mot, ko wot a sap cī e negya,

²¹mwin, hwô tɔk, yaga hwà tɔk barê neyey mot.

²²A sé yaga wot a sé bemo de wot a sé e nû reku kayɛ jeng. Be jut ot sede vyēl de be kyè wɔ̀ yɛt.

²³Sene, à Darwey! Yaga sɛ́ de hwà sê nevwa ɛ? Sogo! Hwo ye zakzak a hot wɛt!

²⁴Yaga sɛ́ de hwà kyɛ́ o nà wok ɛ? Wot a sé sɔ reyɔm na rezot, ko hwà ka di ot wɛt.

²⁵Wot a sé e dyɛngɛ vaalal e vwel, babek mot ba ga ye pang e fongol.

²⁶Sogo! Sɛlɛ hot! Sey ot, yaga hwà tɛ̀ yey na wot.