Read berom Lɛlɛ 45 Bible Online

Lɛlɛ 45 - berom bible

Lɛlɛ 45

¹Lwɛlɛ̂ yaga Kora de gwo rɔgɔm. Lwɛlɛ̂ tɛ̂ yey. Bē ra gwɛ na fwɔ̂ lwɛlɛ̂ “Bejamuk líli.” Gwá sè e vwɔ̂ mwât kyé na lɛlɛ. Báre hom ha sila na neha nerat, ma sé yong lwɛlɛ yaga gbɔng gwɔ̀m. Mê ra fwom na lem hom, sede mwât sekwɛl e ra fwom na kwêt jɛk.

²Hwà dal bwang bemat mwa na nekasang! Neha mō na sé mwɛɛsɛs, na sé tyang. Yaga ano, Dagwi a tɛ̀ á hwo nerat gbak-gbak.

³À suga, hwà sé gbɔng o wo nerey na nerat. Gana wal mō.

⁴Laga dwa e ji gbɔng nerey na nerat mō mo! Kyè wɔ di wɛng, tumal e ra tsak o. Sɛlɛ bepɛng, gas a yɛn shɔt e tē, rá pyɛ́ de yê tɛ̀, bemat be wok bengyip mō.

⁵Ket de hwó tabas mɛ ba sé zomzom, bê luga neyey bemât repugu mō, yére bemât jey yê gaba e cât bol mō.

⁶Gwofwa negwɔm mō gwa sé gwo Dagwi,[16] gwô nàra gbak-gbak! Hwô gas a bemat mō shɔt e tē.

⁷Hwó tɛ̀ yey na pyɛ́ ryat, ko hwó kyɛ́ o pyɛ́ vyes. Yaga ano, Dagwi mō a ga kasa hwo, a ga tɛ̀ yey mō ye pɛngɛ ding-ding ye dal yê bwang bemat mō.

⁸Berugu mō be ro nesang nerat nè něy mir, na alowe, tanga kasiya. Be dak yôm kwo e nelɔ mō de ba tɔrɔ nɛ̀ na yìn gbin, e tá a hwo.

⁹E ji beha de ba sé e ji lɔ mō, nèy behwông begbɔng begwɔ̀m na sé ɛ. Derwey a sé e tumal e vwɔ yegê gwofwa negwɔm mō, a tɔrɔ hɛ na yɔ̀m celes dyam shinang.

¹⁰À hwóng hom, wet betong na hwo jut e yey mō pyɛ de mê ha: Hwô to sè tanga bemat mō wɛt.

¹¹Nezɛrɛ mō nê tɛ̀ gbɔng gwɔ̀m a vɔk cwey mō. Yɛ wɛ a dalɔ mō, dyɛng to mō na yɛ.

¹²Bemât repomô Tur bê vɛ̀sɛ a hwo na nenɔrɔ, bedaberey bê ye ngyɛ́k, na be sɛ̀ nerat yi na hwo.

¹³Hwōng o a sé zɛrɛ tyɔng wɛt. Ba tɔrɔ rugu mɛ na shwêy dyam shinang. A sé yel e ji lɔ gwɔ̀m,

¹⁴yɛ tanga berungat mɛ ba sé bɔrɔs e ra beput de ba tɔrɔ vɛ na nzem, be kyè wɔ kyɔk a gbɔng gwɔ̀m hɛ.

¹⁵Be kyě na râ lwɛlɛ̂ yey pyɛng, be rɛ̌ na nzem wɔ̀ yel e ji lɔ mo.

¹⁶À gbɔng gwɔ̀m, hwô sɛ̀ nèy bewen de nê tut e gwofwa negwɔm, tyɛng sede beda mō de ba kana tut ɛ. Hwô tɛ̀ ɛn, be tɛ́ ɛn vê vɔ̂k negwɔm e ra bavwel pyak.

¹⁷Ko me ra lwɛlɛ hom na be dopse bare na hwo vɔk e nezamang. Mwa yére bemât jey ya rɔda somo hwo vɔk e nesheneshey.