Read berom Lɛlɛ 46 Bible Online

Lɛlɛ 46 - berom bible

Lɛlɛ 46

¹Lwɛlɛ yaga ruhûp Kora. Bē ra gwɛ na fwɔ e rak o. Gwá sè e vwɔ̂ mwât kyé na lɛlɛ. Dagwi a sé a wot kwɔ̂n dal, e nɔng ot yey ting. Kayɛ jeng a sé e yong ɛ, na a sɛlɛ hot e jeng reyɔm.

²Ka jey ya ka sé digis, ka beraku be ka gabsa e ji ciwil gworep, ka berep be ka wus, be tē funglang, ka beraku be digis yaga lolông berep o, wot a rɔda vɔk bengyip wɛt!

⁴E gbɔng repomô Dagwi, gwɔrɔt gwa sé de gwo pɛngɛ a bemat neyey. Dagwi De A Dal Na Reto Mwa a tik repomo mo jaram na a sangal ɛ.

⁵Dagwi pyɛ mɛ a sé e ji gbɔng repomo mo, bê sang wey na rɛ ko tyɔng wɛt. E rwa hwol gasi, ê vey a rɛ na sɛlɛ.

⁶Dagwi e lumta, ko yere bemât jey ye tɛ̀ bengyip, ye vow. Retô vemo de ba sé re negwɔm ra sé nusu yi e vɔ mɛn, ko jey ya pere ye ywey.

⁷Dagwi Darwey, Dâ Jey Mwa a sé tanga wot. Dagwi wo Yakɔp a sé a wot kwɔ̂n dal.

⁸Vey in, na yin a di pyɛ de Dagwi Darwey a ga ra, gwong de a ga vey na wéy e jey!

⁹E tɛ̀ be tik tô como e neyɛnɛ̂ jey mwa, e kwɔrɔs begbang na bebara, ko e dak kya e beruga.

¹⁰E moklo, “Tik in cɛk! Tɔk in, e me wɛ à Dagwi! Ma dal na reto e ji yére bemât jey, ma dal na reto e ji jey mwa!”

¹¹Dagwi Darwey, Dâ Jey Mwa a sé tanga wot. Dagwi wo Yakɔp a sé a wot kwɔ̂n dal.