Read berom Lɛlɛ 47 Bible Online

Lɛlɛ 47 - berom bible

Lɛlɛ 47

¹Lwɛlɛ yaga ruhûp Kora. Gwá sè e vwɔ̂ mwât kyé na lɛlɛ. À yin bemât jey mwa, dak in vɔ yaga yey pyɛng, ra in a Dagwi lwɛlɛ na gbɔng fwɔ!

²Sap in Dagwi Darwey, Yɛ De A Dal Na Reto Mwa. A sé gbɔng gwɔ̀m, e re negwɔm e ra jey mwa.

³A nɔng ot wɛng e ra yére bemât jey, a tɛ̀ wot re negwɔm e ra yɛn mwa.

⁴Yɛ a kasa a wot vwel de wot a sé sangal ɛ, wot e dak mɛ gèy, wot yére Yakɔp de a tɛ̀ yey na wot.

⁵Dagwi a sé tut vɔk e gwofwa negwɔm mɛ! Ba sé gbɔ yaga yey pyɛng, be pɛsɛl bedurum.

⁶Rá in a Dagwi Darwey lɛlɛ, rá in vɛ na dâk yōm! Ra in a gbɔng gwɔ̀m mot lɛlɛ, rá in vɛ na dâk yōm!

⁷Ey, Dagwi a sé gbɔng gwɔ̀m jey mwa, ra in a yɛ lwɛlɛ de gwo rɔgɔm!

⁸Dagwi a sé sangal e gwofwa negwɔm mɛ gwo jɛrɛ, e re negwɔm e ra yére bemât jey.

⁹Bemât nuyêl yére mo ba tula hɛn, tanga bemât fwôm Dagwi wo Abraham. Mwâ begwɔ̀m jey be dyɛng bato mɛn na Dagwi. Yɛ Wɛ De A Dal Na Reto Mwa.