Read berom Lɛlɛ 48 Bible Online

Lɛlɛ 48 - berom bible

Lɛlɛ 48

¹Lwɛlɛ̂ yaga ruhûp Kora Dagwi Darwey a sé gbɔng wo nerey! Bē nɔng ɛ nerey ding-ding e ji repomo de ra sé remɛ. Raku de a tik jaram yaga yɛ

²wa sé rwat, wa sé lwis vɔk e rak o. Wo vey a jey mwa na yey pyɛng. Raku Siyɔn wɛ a rakû Dagwi wo mwin o, kwɔn a hane de repomô gbɔng gwɔ̀m ra sé ɛ.

³Dagwi a sé e ji repomo mo, na a dul rɛ, a ga dura, yɛ wɛ à kwɔ̂n dâl bemât repomo mo.

⁴Begbɔng begwɔ̀m ba wuna hɛn, mwa hɛn ba hwo e ra repomo mo.

⁵Ko jeng de yɛn a di rɛ, a yang ɛn kpɔrɔk, bengyip ba vo ɛn, a sé a yɛn kpɛɛ.

⁶Ba vow sedesi sede hwā e ra bakwot,

⁷sede bemat e ji begbɔng bedwa-nshi jeng de gûl gap gwo kangat vɛ.

⁸Wot a ga kana wok hâ pyɛ́ yemo mwa, ko a remo, wot a ga di yɛ̄ e ji repomô Dagwi mot, yɛ Dagwi Darwey, Dâ Jey Mwa. Yɛ ê gyeng repomo mo tyang neshey gbak-gbak.

⁹À Dagwi, e ji Duk Re a Hwo Fongol, wot e tɔrɔng e ra nerat de hwó dura a wot.

¹⁰E kagwa, bemat be somo hwo, hwà vɔk za e jey mwa. Hwó di wɛng na vwɔ̂ gap mō.

¹¹Tik na bemât Raku Siyɔn be vɔk yey pyɛng! Tik na bemât bapomô Yuda be rɛ̌ na nzem, yaga hwó gas badu e tē!

¹²Rɔnɔ hin Siyɔn, kyě gwɔsɔ hin wɛ, bara hin betyon wɛ,

¹³bɛrɛng hin yɛɛlɛl bejwa-duk na nekwɔn dal o. Ano kwong, yin ê tɔk ha a nezamang min ne véy:

¹⁴“Yàa! Dagwi wo reto a womo! A sé Dagwi mot gbak-gbak, ko ê kyè na wot kayɛ jeng.”