Read berom Lɛlɛ 49 Bible Online

Lɛlɛ 49 - berom bible

Lɛlɛ 49

¹Lwɛlɛ yaga ruhûp Kora. Gwá sè e vwɔ̂ mwât kyé na lɛlɛ Wok in, à yin yére bemât jey mwa, Wet in betong, à yin bemasi e kagwa!

²À yin berey na besɛl o mwa rìning o, bedaberey na bepɛng mwa, wok in!

³Ma sé tɔrɔng e ra pyɛ́ de ye gwɛsɛ tɔk, ma sé ha neha de na sé ne netsitsɛng.

⁴Mê doyo nehywɛ hom e ra pyɛ de ya sé dirik, ko mê misang yɛ jeng de ma sé dak yom kwo.

⁵E jeng reyɔm, jeng de bemat beves de be jama bol hom ba gwɔrɔ me, mê wok bengyip wɛt.

⁶Yɛn e tɛ̀ gap mɛn e ra yas mɛn, be dak kaa na gbɔng nedanerey de ba vɔk.

⁷Ko vit a mwat de e tɔk sey neken mwat hwak na dyām yi na Dagwi, kɛ a tala hɛ dyām, na yɛ pyɛ mɛ a nàra kwen.

⁸Tála yaga nekên mwasi ha dal gap, ka a ka tala ala ayi, yê wul kwɔn hak wɛt.

⁹Bemasi bê nàra beken gbak-gbak wɛt, vit a mwat de ê tik nà yel e vwel.

¹⁰Kawɛ mwat a tɔk, bemât netsitsɛng bê kushu mwa na bemat de ba kat netɔn, ko mwa hɛn bê hala a behak yas mɛn.

¹¹Sak mɛn[17] bê tɛ́ ɛn nelɔ mɛn gbak-gbak, e hwomo de yɛn ê nàra kayɛ jeng, mwa ano de yɛn a kana vɔk benap mɛn.

¹²Vit a mwat de ê nàra kwen yaga nerey na yas mɛ, ê ku tyɛng sede ngyāma arɔng.

¹³Di, pyɛ ma yemo de ye té na betɔn tanga vemo de be tɛ̀ gap mɛn e ra neha mɛn:

¹⁴Ba sé sede vyēl de lwek mɛn à reku, re kyè na yɛn vɔk e kwɔ̂n bevuvwel. Nagasi, bemat de ba sé cik bê kyè e ra yɛn, ko babek mɛn ba sé bɔsɔ e ji sak,[18] yikyik yi na nelɔ mɛn nerat o.

¹⁵Ko Dagwi pyɛ mɛ ê sey me à me, a rɔda hywit me yi e retô reku.

¹⁶Jeng de mwat hwak a sé tɛ́ ɛ darwey, ko a sé gwɛsɛ yele mɛ arɔng, hwo kwon bɔrɔk to mō wɛt.

¹⁷Jeng de ê ku, ê kyè na pyɛ cak wɛt, yele mɛ mo yê raa hɛ vɔk e sak wɛt.

¹⁸E ji sangal mɛ e jey, e jut to mɛ, a sé mwât wôk neta, ko bemat be tē jik yaga wɛng mɛ.

¹⁹Ko mwa ano, a rɔda ba wɔ̀ sɛ̀ bedabeda de ba ga kushu, de bé sang di negbêy gwi wɛt.

²⁰Vit a mwat de ê nàra kwen yaga nerey na yas mɛ, ê ku tyɛng sede ngyāma arɔng.