Read berom Lɛlɛ 50 Bible Online

Lɛlɛ 50 - berom bible

Lɛlɛ 50

¹Lwɛlɛ̂ Asaf. Dagwi wo nerey, Dagwi Darwey a hanat, a yila mwa jey yi e rwa rak wɔ e ta.

²E dura tó mɛ e ji nedyɛt nerat mɛ e repomô Siyɔn de nerat na sila hɛ.

³Dagwi mot e kyè vey, ko ê sǎ yuu wɛt. Kya he re e nuyel mɛ, jey ya sé gyibit-gyibit, ko yɛ e tê yɛ.

⁴Jeng de ê ra a bemat mɛ shɔt, e yila lagwi tanga jey, na be nɔng nuha.

⁵E tē, “Tula hin a me bemat de ba sé pang na me! Yɛn a nára a me nɔrɔ, ko wot a wuna hot na sira.”

⁶Ko lagwi wo ha wɔgɔ, Dagwi e gas shɔt e bē, yɛ wɛ e ra a bemat shɔt pyɛ mɛ.

⁷“À bemat hom, wok in, me kyè wɔ ha! À BeIsrayɛl, wet in betong, mê vey na sekun min. E me wɛ à Dagwi, Dagwi min.

⁸Yin e vɛ̀sɛ a me na nenɔrɔ, ko ma vɔk pyɛ cak de mê ha e ra nɛ wɛt. Yin e nása a me nenɔrɔ̂ yas burang kayɛ jeng,

⁹ko me simo nɛ wɛt, kɛ bemus min kɛ begam min ow.

¹⁰Mwa ngyāma e bahwot ya sé nyang, berɔndɔng de be re hwey e berahwol de vit a basa ba sé benang.

¹¹Mwa benon beraku ba sé benang, na mwa pyɛ́ cen de ya sé e hey.

¹²“Ka ma sé wok vyong, ko me kyè wo ha a yin wɛt, yaga jey na mwa pyɛ́ de ya sé e ji yɛ ya sé nyang.

¹³Me re banamâ bemus, kɛ me sɔ nemî vyēl arɛt?

¹⁴E pyɛ̂ re de me simo wɛt, ko me simo, yin a feng a me e negya! Ma sé Dagwi De A Dal Na Reto Mwa. Nɔng in me pyɛ́ de yin a ga vo a me nu.

¹⁵Ano kwong, jeng de reyɔm re vey a yin, yila hin me. Ma rɔda sey in, ko yin ê somo me.”

¹⁶Ko Dagwi e tâng bemat beves, “Yin a sé beva de yin e há a bemat badu hom ɛ? Yaga sɛ́ de yin e ha e ra sira de ma wuna tanga yin ɛ?

¹⁷Yin e kyɛ́ in gyong hom, yin e kyɛ́ in redu de ma nɔng in.

¹⁸Yin e tɛ́ in sâ kawɛ gbik, ko yin e wuna bato min na bemât ragas nejwang.

¹⁹“Yin e ha sede kya he re hey, nenu min na ga tɔ́k ɛn na nebɔs.

²⁰Yin e sangal, yin e hwara bemin, yin e to lashe nezâ begwa jim min mwa arɔng.

²¹“Yin a ga ra pyɛ́ yemo mwa, ko mê tùt ɛ nu wɛt a? Yin e jut me sede yin a? Di a remo, ma sé vey na sekun min, ko mê basa a yin pyɛ̂ sekun min o.

²²“À yin de yin e ra sede ma sé wɛt, wok in, tē in naka! Ka ano wɛt, mê wey na yin, ko vit a mwat hwak de ê sey in.

²³Sede be feng a me, hɛ a nɔrɔ de he nɔng me nerey. Ko yɛn vemo de be gyeng ha hom, bê sɛ̀ sɛlɛ hom.”