Read berom Lɛlɛ 51 Bible Online

Lɛlɛ 51 - berom bible

Lɛlɛ 51

¹Lwɛlɛ̂ Davit. A ra gwɛ jeng de Natan, zarap Dagwi, a wɔ na a ha a yɛ e ra mân bek na Batsheba. Gwá sè e vwɔ̂ mwât kyé na lɛlɛ. À Dagwi, tosho reyɔm hom, yaga hwó tɛ̀ yey na me. Hwà sila na nemwishish, fugut banɛn hom!

²Kus me haalal yi e pyɛ́ vyes de ma ra, tɛ̀ me haalal yi e renɛn hom!

³Ma tɔk renɛn hom, ma bare na rɛ kayɛ jeng.

⁴E hwo wɛ de ma ga ra a hwo renɛn, ma ga ra pyɛ de ya sé vyes e bayis mō. Yaga ano, hwà ra tyɛng de hwà sé tɛ̀ sekun hom, ko jeng de hwô yɛrɛ a me shɔt, hwô yɛrɛ yɛ e tē.

⁵Yimo tuk de ba tɔ me, ma ga ra banɛn na pyɛ́ vyes.

⁶Ko hwó simo, bemat be vɔk tsak o. Basa a me netsitsɛng yerê nemó.

⁷Fung banɛn hom na kelang hísɔ̀p, na me sè haalal, kus me, ko ma rɔda se halalal.

⁸Yang me, hwà ga hala a me, ko mê sila na yey pyɛng. Mwa ano de hwà ga kwɔrɔs a me nedem hom, mê to rɛ̌ na nzem.

⁹Hwo bɛrɛng banɛn hom wɛt, fugut mwa pyɛ́ vyes de ma ra.

¹⁰À Dagwi, tɛ̀ me mwat pwas, na me to se pang na hwo.

¹¹Hwo ro me yi e nuyel mō, kɛ hwo gas me na gabîk jɛrɛ mō wɛt.

¹²To tɛ̀ na me vɔk yey pyɛng, yaga hwà hala a me, tɛ̀ me simo gyêng ha mō.

¹³Ano kwong, ma rɔda basa a bemât banɛn begwong mō, na be bin toyo vey na hwo.

¹⁴À Dagwi, hwà sé mwât sey me. Pyɛ de ma ra ya vey reku, gabɔk wɛt, tík me kwen! Ko ma rɔda somo hwo na lwɛlɛ, yaga hwà sey me.

¹⁵À Darwey, wunta nu hom, na me to tɔk somo hwo.

¹⁶Hwó simo nenɔrɔ̂ yas de be yɛt wɛt. Ko ka ma ka nára a hwo nɔrɔ̂ yas burang, yey mō ye pɛngɛ na hɛ wɛt.

¹⁷Sede wot a tik dâk kaa, na wot a lashe yey yaga banɛn mot, wot e pɛngɛ a hwo yey. Yerê nɔrɔ ma hane de hwo simo.

¹⁸Dura a Siyɔn nerat mō, na wo gwɛ̌ re nuyel, to lɔk jwa-pomô Yɛrusalɛm.

¹⁹E bama mo, wot ê tɔk nára nenɔrɔ̂ yas de be yɛt, ka a ka sé yemo de be rangas burang, e gwong de gwô pɛngɛ yey mō. Wot ê to tɔk nára bemus e ra gàgbang rangâs yas mō.