Read berom Lɛlɛ 52 Bible Online

Lɛlɛ 52 - berom bible

Lɛlɛ 52

¹Lwɛlɛ̂ Davit de gwo rɔgɔm. A ra gwɛ e bama de Dowek WoƐdɔm a wɔ ha a Saul wɔgɔ, Davit a ga kyè vɔk e lɔ Ahimɛlɛk. Gwá sè e vwɔ̂ mwât kyé na lɛlɛ. Key kàa! À hwo de hwó jut to mō, hwà sé suga, yaga sɛ́ de hwó dak gey na neves mō ɛ? Di, Dagwi e dura a bemat mɛ nerat kahɛ tuk.

²Hwó yong begwông wey, na hwo lashe mɛ behak. Nu mō ha sé vootot sede bâ hwon, à hwo mwât fanang.

³Hwó simo râ neves e ra nerat, hwó simo râ bɔs e ra hâ tsak o.

⁴Hwó wok netâ neha roros a bemat neyey, à hwo mwât kwɛlɛng!

⁵Yaga ano, Dagwi a rɔda wey na hwo pyɛt. Ê ye kap a hwo, na a pat o yi e lɔ mō. Ê lut o yi e vê neken, sede be luyu sɔng.

⁶Jeng de bemat de be gyeng hâ Dagwi bê di, ê yang ɛn kpɔrɔk. E bama mo, yɛn ê shɛgɛsh, be tē:

⁷“Di, rwas womo mo! A tɛ̀ gap e ra Dagwi mɛ wɛt, ko a tɛ̀ gap e ra yele mɛ, yemo de a sɛ̀ e begwong beves!”

⁸Ko me, ma sé sede tîn cɔgɔ̂t pwat, de he ras e duk re a Dagwi fongol. Me tɛ̀ gap e ra nerat de e dura a me gbak-gbak.

⁹Ma rɔda feng a Dagwi kayɛ jeng, yaga pyɛ de a ga ra. E nuyêl bemat de ba sé pang na yɛ, mê ha wɔgɔ, a sé wo nerat.