Read berom Lɛlɛ 55 Bible Online

Lɛlɛ 55 - berom bible

Lɛlɛ 55

¹Lwɛlɛ̂ Davit de gwo rɔgɔm. Bē ra gwɛ na yōm. Gwá sè e vwɔ̂ mwât kyé na lɛlɛ. À Dagwi, wok won hom. Hwo kyɛ́ o nà sey won hom wɛt!

²Wet betong na me, na hwo hanat a me. Yey hom ye bɔrɔk me, me rus, me tosho.

³Bemât repugu hom be gbɔ me, be shìsa me. Bé teshe na me, be ra shom na me, ko be bɛɛ me ves sizɔng.

⁴Yey hom ya sé sede yê lut ɛ, bengyip reku be vos me.

⁵Nemi ne gabsa a me e yey, me vo bengyip, ko me vow.

⁶Káa! Ka ma vɔk bafabak sede gwobɔp, ka ma yang sogo me kyè, me wɔ jama kwɔn de mê pɔng ɛ.

⁷Ma yang tele vɔk e dem yikyik, me wɔ̀ sangal e hey.

⁸Ma yang ra ziri, na me wɔ dal yi e gwogul rwak na sombabos.

⁹À Darwey, suk neha bemât repugu hom! Lashe pyɛ́ de be yong, yaga me bɛɛ bemat de be sogo nehywɛ, be ra yol zɔng e ji repomo.

¹⁰Sógo nehywɛ na yol o ba sé sede bemât gyeng de be kyě gwɔsɔ e ra jwa-pomo mo nagwi na naturuk. Repomo mo ra sila na ragâs nengyas tanga reyɔm.

¹¹Be mɔbɔs bemat e ji rɛ, ko e kahɛ hyok, bemât jamâ repugu tanga vê kwɛlɛng be kyě rini ɛ.

¹²Ka a sé wo repugu hom de e shɛgɛsh me, ka ma yang niri. Ka a sé mwat de e bɛɛ me ves, de e dak kaa e ra me, ka ma yang lɛrɛ me yi na yɛ.

¹³Ko a sé e hwo de wot a sé pyɛ jining, sâ kwɛngɛl hom de wot a ga tɔ́k ot!

¹⁴Wot a ragas berem berat sizɔng, wot na hwo, wot a kyese tanga behak e duk rê fongol.

¹⁵Tik na reku re vo vê repugu hom hák, tik be gyirik beken vɔk e kwɔ̂n bevuvwel, yaga neves na sé e nelɔ mɛn tanga e neyey mɛn.

¹⁶Ko me à me, me yila Dagwi Darwey yaga sɛlɛ, ko a rɔda sey me.

¹⁷Me rus, me tosho nagasi, nagwi tanga naturuk vɔk na yɛ, ko e wok me.

¹⁸Bemat pyak be gwɔsɔ me, be hwosom me, ko ê pat me tyang yi e yol de me ra na vê repugu hom.

¹⁹Dagwi de a sé re negwɔm yimo e susû jey a rɔda wok me. Ê di wɛng e ra yɛn, yaga be kyɛ́ ɛn nà sege negwɔn mɛn, ko be ka wok bengyip Dagwi wɛt.

²⁰Mwat de a kana sè sa hom a ga hwo e ra besa mɛ, a ga kwɔrɔ vonu de a ga ra a me.

²¹Neha mɛ na sé mwɛɛsɛs sede shok, ko repugu ra sé e ji yey mɛ. Neha me ne tele sede něy, ko ne yɛt sede bewal de ba sé vootot.

²²Vey na negbang mō e nuyel Dagwi Darwey, yaga e wok nemwishish mō. Ê tik pyɛ cak ye dikta womo de sé mwɛ ko tyɔng wɛt.

²³Ko hwo, à Dagwi, hwà rɔda wul na bemât mɔbɔ̂s bemat, na vê vɛsɛ bɔs e sak, gyam na be wul rebit nepyak nepɔlɔ mɛn. Ko me, ma rɔda tɛ̀ gap e ra hwo!