Read berom Lɛlɛ 56 Bible Online

Lɛlɛ 56 - berom bible

Lɛlɛ 56

¹Lwɛlɛ̂ Davit de a ra e bama de BeFilisti ba vo ɛ e Gat. Bē ra gwɛ na fwɔ̂ lwɛlɛ “Gwobɔp de gwa sé yuu de gwa sé shan.” Gwá sè e vwɔ̂ mwât kyè na lɛlɛ. À Dagwi, tosho reyɔm hom, yaga bemat be pɛsɛl a me kya. Mwa wosho, vê repugu hom be hwosom me.

²Vemo de be hwosom me ba sé pyak, yɛn e pɛsɛl a me kya mwa wosho.

³À Dagwi De Hwà Dal Na Reto Mwa, ka ma ka sé e ji bengyip, mê tɛ̀ gap e ra hwo.

⁴Me dak kaa na Dagwi, yaga a ga vo a me nu, ê sey me. E yɛ de ma tɛ̀ gap e ra yɛ, ko mê wok bengyip wɛt, E yɛ̌ pyɛ de mwasi zɔng ê ra na me ɛ?

⁵Bemât repugu hom be sɛgsa ha hom mwa wosho, be bare pyɛ́ vyes de bê ra a me zɔng.

⁶Yɛn e tula hɛn e lɛrɛ, be bɛrɛng kayɛ pyɛ de me ra, ko be simo be wey na me.

⁷Yɛn ê wul dem hak na neves mɛn o a? À Dagwi, wey na yɛn e ji shom mō.

⁸Hwà tɔk ríni hom mwa, hwà ga tula nemwishil hom, nepyak nɛ na sé e jɛk na hwo.

⁹Ano, jeng de mê yila hwo yaga sɛlɛ, bemât repugu hom bê to ɛn na bama, yaga ma tɔk, hwo à Dagwi, hwà sé tanga me.

¹⁰Me dak kaa na Dagwi, yaga a ga vo a me nu, ê sey me, ey, me dak kaa na Dagwi Darwey yaga vonu me mo.

¹¹E yɛ de ma tɛ̀ gap e ra yɛ, ko mê wok bengyip wɛt. E yɛ̌ pyɛ de mwasi zɔng ê ra na me ɛ?

¹²À Dagwi, mê sila pyɛ́ de ma ga kana vo ɛ nu, mê nára a hwo nenɔrɔ na me feng a hwo mɛ.

¹³Hwà ga sey me yi e reku, hwà tik na me ye bugurɛk wɛt. Ano, mê kyè e nuyel mō, e ji negbey de ne nɔngɔs neken.