Read berom Lɛlɛ 57 Bible Online

Lɛlɛ 57 - berom bible

Lɛlɛ 57

¹Lwɛlɛ̂ Davit de a ra jeng de a lɛrɛ hɛ e fwara, na a hywit ɛ yi na Saul. Bē ra gwɛ na fwɔ̂ lwɛlɛ̂ “Hwo kwon wey na me wɛt!” Gwá sè e vwɔ̂ mwât kyé na lɛlɛ. Tosho reyɔm hom, à Dagwi, tosho reyɔm hom! Me jama kwɔ̂n dal na hwo. Hwó dul me, sede congot ye dul nèy yɛ e nɛ̂n bafabak yɛ, sɛ̌ gwalumla gwa kwey.

²Me yila e ra hwo de Hwà Dal Na Reto Mwa, hwo, hwó nɔng me pyɛ de me simo.

³Hwà rɔda tomo na sɛlɛ yi e lagwi na hwo sey me, ko hwô tɛ̀ bemat de be pɛl a me kya be sɔ rekyen. À Dagwi, hwô dura a me nerat mō, hwó ye waa a me ko tyɔng wɛt.

⁴Vê repugu ba rɔnɔ me sede begukum de be re bemasi. Nenu mɛn ne nunus na ha sede bebara na ket, ne yɛt sede bewal de ba sé vootot.

⁵À Dagwi, tɛ̀ nedyɛt nerat mō ne tɛ̀ lagwi wo nɛp, tik be di gbɔng nerat mō e ji jey mwa!

⁶Bemât repugu hom ba ga rene segun na be vo me mɛ, ko ma ga ye waa. Ba kas vɔng na me gaba ɛ, ko yɛn pyɛ mɛn ba hwo e ji hɛ.

⁷À Dagwi, yey hom ya sé ting, ya dikta hɛ wɛt. Mê ra a hwo lwɛlɛ, mê dak a hwo yom.

⁸Ma ga sene wɛng-wɛng, a remo, mê jut yom, me wɔ sene mɛ gwi.

⁹À Dagwi, ma rɔda féng a hwo e ji yére bemât jey, ma rɔda ra a hwo lwɛlɛ na yom e ji mɛn.

¹⁰Hwà tɛ̀ yey na bemat bagat wɛt, hwô sang gas cáng na yɛn ko tyɔng wɛt.

¹¹À Dagwi, tɛ̀ nedyɛt gbɔng nerat mō ne tɛ̀ lagwi wo nɛp, tik be di gbɔng nerat mō e ji jey mwa!