Read berom Lɛlɛ 58 Bible Online

Lɛlɛ 58 - berom bible

Lɛlɛ 58

¹Lwɛlɛ̂ Davit de be ra gwɛ na fwɔ̂ lwɛlɛ “De hwo wey mɛ wɛt.” Gwá sè e vwɔ̂ mwât kyé na lɛlɛ. À yin begwɔ̀m, yin e gas shɔt e tē a? Yin e ra a bemat mwa shɔt de ya sé tɛk a?

²Wey! Yin e yong pyɛ́ vyes e neyey min, ko yin e ragas neves de ne vey na sogô nehywɛ e vwel o.

³Bemat beves o be hwo ɛn gyam, ba tɔ ɛn na nebɔs.

⁴Neha mɛn na sé sede nedɔ̂m gwɔ̄m. Bé kyɛ́ ɛn nà wok ha sede gàbak de gwa sé kpey,

⁵ko gwo wok mwât râ ju kɛ mwât râ vyoshon wɛt.

⁶Bemât repugu hom ba sé pyɛ bengyip sede gukum. À Dagwi Darwey, gangas yìn mɛn, kwɔrɔs jōro begukum vemo!

⁷Tik be ye bit, sede nshi na ye jɔng, tik ket mɛn be vos vwel!

⁸Tik be ku sede begyéng de be hworok! Tik be sè sede hwey de ba pat, de ha ga di jey wɛt!

⁹Wey na yɛn ziri, ziri a dal pyɛ́ de be kyé na necɔgɔ̂t rɔgɔ![20]

¹⁰Bemat vemo de ba sé berat bê vɔk yey pyɛng jeng de ba di Dagwi a sé tala bemat beves neves mɛn, ko vê nerat bê kyè kyùlúm-kyulum e ji nemi mɛn.

¹¹Bemat bê ye, “Yàa! Dagwi e tala bemat berat pyɔlɔ ryat! Ey, mwin, Dagwi a sé wo gâs badu e tē e ra jey.”