Read berom Lɛlɛ 59 Bible Online

Lɛlɛ 59 - berom bible

Lɛlɛ 59

¹Lwɛlɛ̂ Davit de a ra jeng de Saul a tomo bemat na be gwɔrɔ lɔ mɛ, na be mɔrɔ hɛ. Bē ra gwɛ na fwɔ̂ lwɛlɛ “Hwo kwon wey mɛ wɛt.” Gwá sè e vwɔ̂ mwât kyé na lɛlɛ. À Dagwi hom, sey me yi e vɔ bemât repugu hom, dul me yi e vemo de be hwosom me!

²Sey me yi e bemât ragâs neves, sey me yi e bemât mɔbɔ̂s bemat!

³À Dagwi Darwey, vê repugu de be wok na gap ba ga man bato mɛn. Di, ba sé e wɛlɛ, be gyeng na be mɔrɔ me, ko ma ga buru kɛ ma ga ra renɛn rehak wɛt.

⁴Vit a me nà nɛn, ko mwa ano, ba sé e yong ɛn na be hwo e ra me. Di, yɔ́m de me sɔ! Sogo na hwo sɛlɛ me!

⁵À Dagwi Darwey, Dâ Jey Mwa, hwà sé Dagwi wo BeIsrayɛl. Sogo na hwo tabak mwa bwâng yére mo! Hwo wok nemwishish bemât nengyas de be row bemɛn wɛt!

⁶Nawiri, be toyo e dem mɛn, be paa yìn sede bevu, be rìni e ji repomo.

⁷Wok haras na shisa mɛn, neha mɛn na sé sede nebǎ vootot, ko be bare, vit a mwat de e wokos hɛn.

⁸Ko hwo, à Dagwi Darwey, hwó shɛgɛsh hɛn, hwó shɛgɛsh mwa bwâng yére mo.

⁹Hwó nɔng me gap, me sɛt bayis e ra hwo. À Dagwi, hwà sé a me kwɔ̂n dal.

¹⁰Hwà tɛ̀ yey na me mwin. Hwó kyè e nuyel hom, hwó tɛ̀, me di wɛng e ra vê repugu hom.

¹¹À Dagwi, hwo wey na yɛn e jeng jining wɛt, ka ano wɛt, bemat hom bê ye bam na wɛng de hwà di. Rá fwom na reto mō, shara hɛn, wey na yɛn! À Darwey, hwó dul bemat mō sede ruga.

¹²Mwa pyɛ́ de yɛn e ha ya sé vyes. Tik na dâk kaa de be dak, na gawey de yɛn e mok, na nebɔs de be yɛt, be vo ɛn sede segun.

¹³Wey na yɛn e ji shom mō, wey na yɛn hywiri! Ano, bê tɔk vɔk e neyɛnɛ̂ jey wɔgɔ, Dagwi e re negwɔm e vwêl Israyɛl.

¹⁴Nawiri, be toyo e dem mɛn, be paa yìn sede bevu, be rìni e ji repomo.

¹⁵Be kyě ra gwogwolom e de jamâ pyɛ̂ re. Ka ba sɛ̀ pyɛ́ de ya vey a yɛn wɛt, be gwɔrɔng.

¹⁶Ko me, à Dagwi, mê ra lwɛlɛ e ra reto de hwà vɔk, nagasi mê ra biibi, yaga hwà tɛ̀ yey na bemat mō. Hwà sé a me kwɔ̂n dal de me lɛrɛ me ɛ e jeng reyɔm.

¹⁷Mê ra a hwo lwɛlɛ na yom, yaga hwó nɔng me gap. Hwo, à Dagwi, hwà sé a me kwɔ̂n dal, hwà tɛ̀ yey na me mwin.