Read berom Lɛlɛ 60 Bible Online

Lɛlɛ 60 - berom bible

Lɛlɛ 60

¹Lwɛlɛ̂ Davit yaga masa a bemat. Bē ra gwɛ na fwɔ̂ lwɛlɛ “Bejamûk líli ve vonu.” Gwá sè e vwɔ̂ mwât kyé na lɛlɛ. Davit a ra gwɛ e jeng como na BeSirya vê Mɛsɔpɔtamya-Bato tanga vê Tsoba. Jeng de ba sè toyo, Yowap, mwât nuyêl como mɛ, a wey na bemât comô BeƐdɔm gu kuru na vɛ baba (12,000) e Nɛk Nevwashe. À Dagwi, hwà ga ye zak a hot, hwà gang nekwɔn dal mot, hwà tɛ̀ shom na wot. Káa! To toyo na wot!

²Hwà ga tɛ̀ vwel o he dikta, ha wunta hɛ. A remo, bang hɛ, yaga ha sé e nû gaba.

³Hwà ga tɛ̀ ot, bemat mō, wot a sɔ reyɔm sizɔng, hwà tɛ̀ ot, wot a sɔ nshî anap de na tɛ̀ a wot sefeng.

⁴Hwà pɛl durum mō na hwo hwɔtɔ mɛ nehywɛ vemo de be sap o, ano, bê hywit ɛn yi e ket bemât repugu mɛn.

⁵Hanat a wot, jeng de wot a yila, sey ot na vwɔ mō gwô gap. Ano, wot de hwà tɛ̀ yey na wot, wot ê se washak.

⁶Dagwi a hanat yi e kwon de be re a yɛ fongol, a ye, “Yey hom ya pɛngɛ sedesi, yaga ma di wɛng. Mê gas repomô Shɛkɛm na bemat hom, mê gas a yɛn Nɛk Sukɔt arɔng.

⁷Bavwêl Gileyat na Manase ba sé benang, Mê sɛ̀ vemo de bê tó a me como yi e yerê Ɛfrayim, ko yerê Yuda yê nɔngɔs me begbɔng begwɔ̀m.

⁸Vwêl Mowap ha sé gwopey zɔng de me kus me mɛ, mê barak kpatak hom e ra vwêl Ɛdɔm, na me dura, ha sé nang, À yin BeFilisti, rá in a me pee!”

⁹À Dagwi, wa ê kyè na me vɔk e Ɛdɔm ɛ? Gbɔng repomo rane de ba gwɔrɔ na jwa-duk.

¹⁰A sé e hwo wɛt a? Ko di, hwà ga ye zak a hot, hwó to kyè wɔ̂ tô como tanga bemat mot wɛt!

¹¹Sɛlɛ hot, na wot di wɛng e ra bemât repugu mot! Mwa sɛlɛ de mwasi ê nɔng ha sé yapyi zɔng.

¹²Ka sede Dagwi a sé tanga wot, wot ê di wɛng, yɛ ê bɔrɔs vê repugu mot.