Read berom Lɛlɛ 62 Bible Online

Lɛlɛ 62 - berom bible

Lɛlɛ 62

¹Lwɛlɛ̂ Davit de a ra e ra Yɛdutun.[21] Gwá sè e vwɔ̂ mwât kyé na lɛlɛ. Ma tɛ̀ nehywɛ hom vɔk na Dagwi, ko ma sé yaang à me. Yɛ zɔng de ê sɛlɛ me.

²Yɛ zɔng de e dul me sede fwara, e sey me, a sé a me kwɔ̂n dal. Mwat hwak ê tɔk dikta me ko tyɔng wɛt.

³Vɔk e yɛ̌ jeng de yin ê hwosom me ɛ? De mwa hin yin ê sogso e ra me ɛ? Me de ma sé sede duk de wa ga pat gèy zɔng.

⁴Yin a yong begwong de yin ê ye zɔ̌ng a me yi e gwofwa sangal hom. Yin e feng na neha bɔs. Yin e ha há rat na nenu min, ko e ji neyey min yin e mok a me gawey.

⁵Me tang to hom: Tɛ̀ nehywɛ mō vɔk na Dagwi, ko hwô sè yaang a hwo, yɛ zɔng de me sɛt yey e ra yɛ.

⁶Yɛ zɔng de e dul me sede fwara, e sey me, a sé a me kwɔ̂n dal. Mwat hwak ê tɔk dikta me wɛt.

⁷Dagwi a sé mwât sey me, e dul nerey hom. A sé sede fwara de gwa dal a me, kwɔn de wo repugu ê tɔk ra me wɛt.

⁸Tɛ̀ in gap e ra Dagwi kayɛ jeng, a bemat hom. Ha in a yɛ mwa pyɛ́ de ye bɔrɔk hin, yaga a sé a wot kwɔ̂n dal.

⁹Nekên mwasi na sé yapyi zɔng, bepɛng na bedaberey mwa ba ka sé e nû pyɛ wɛt, ka ba mara hɛn mwa hɛn bê ka vey nedirîk gul wɛt.

¹⁰Yin bare, yin ê sɛ̀ nedanerey yi na retek kɛ na gap wɛt, ka sede yele min ye gwɛ̌ hɛ, ko yin sɛ́t ɛ yey wɛt.

¹¹Dagwi a ga ha, ko ma ga wok reha mo zang hining zɔng wɛt wɔgɔ, reto ra sé remɛ,

¹²ko e tɛ̀ yey na bemat. À Darwey, hwô tala kawɛ mwat na tomong mɛ.