Read berom Lɛlɛ 65 Bible Online

Lɛlɛ 65 - berom bible

Lɛlɛ 65

¹Lwɛlɛ̂ Davit. Gwá sè e vwɔ̂ mwât kyé na lɛlɛ. À Dagwi, hwà vey na be somo hwo[23] e Siyɔn, kwɔn de wot e sila vonu mot de wot a vo a hwo.

²Mwa bemasi bê vɛ̀sɛ na hwo, yaga hwó sey won mɛn.

³Banɛn mot ba di wɛng e ra wot, ko hwo wɛ de hwó hala a wot vɛ.

⁴Vê wɛng a vemo de hwà kasa! Hwó vey na yɛn bagat na hwo, na be sangal e lɔ mō. Wot e simo wôk netâ pyɛ́ ryât lɔ mō, hɛ a Gbɔng Duk Re Fongol mō.

⁵À Dagwi de hwó seres bemat kayɛ jeng, sɛlɛ hot, ra a wot tomông langat, na wot a di wɛng. Hwà sé womo de mwa bemât jey be sɛt ɛ̀ yey mɛn, kɛ ba sé yikyik e yé dɔ̂ bèrep.

⁶Hwà tɛ̀sɛ beraku e nekwɔn mɛn na gbɔng gap mo. Hwà nusu na gbɔng reto mō,

⁷hwó tɛ̀ nshî gworep de ne tē funglang, ne lulum, ne sǎ yaang. Hwó dyɛng nehywɛ yére bemât jey de ye sogo rewɔng.

⁸Mwa bemât jey be sap o yaga pyɛ̂ bes de hwà ra, kagwa e jey be mok lwɛlɛ.

⁹Hwó bɛrɛng jey o, hwó nɔngɔ̂s yɛ rwak, hwó tɛ̀ vwel he siri, he nɔngɔs pyɛ́ shɛrɛk. À Dagwi, hwà tɛ̀ nerɔt mō ne sila na nshi mɛf, na vwel o he mara pyɛ́ naka. Ano de hwà yong ɛ.

¹⁰Hwó tomo na rwak pyak e ra cap de ba how, hwó sing cap o na rwak na yè ye ruk, hwó ra ano, na pyɛ́ ye tabas, ye ras naka.

¹¹Hwó tɛ̀ jeng hywɛp ye se ryat, kagwa de hwà kwey ɛ — pyɛ́ polos.

¹²Nekwɔn hêy gbingiring na ga tabas sehwey, beraku ba sé gwim-gwim.

¹³Bagyéng ba sila na vyēl, hirî pyɛ̂ yéneng ba kyiri benɛk sede yɔ̀m. Kagwa be ra biibi na yey pyɛng.